Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..
Құрылтай депутаты, Халықаралық істер, қорғаныс және қауіпсіздік комитетінің мүшесі Дана Медеуова Қазақстан Республикасындағы Еуропалық Одақ Елшісі Алешка Симкичпен кездесті, – деп хабарлайды Aikyn.kz.
Кездесу барысында тараптар Қазақстан мен Еуропа арасындағы ынтымақтастықтың өзекті мәселелерін, парламентаралық байланыстарды нығайту перспективаларын, сондай-ақ Қазақстан Республикасының Құрылтайы мен Еуропалық Парламент арасындағы өзара іс-қимылды одан әрі дамыту жайын талқылады.
– Еуропалық Одақ – Қазақстанның негізгі стратегиялық серіктестерінің бірі. Біз өзара тиімді ынтымақтастықты одан әрі нығайтуға ерекше мән береміз. Бүгінде Қазақстан мен Еуропалық Одақ арасындағы қарым-қатынастар кең ауқымды бағыттар бойынша қарқынды дамып келеді. Тараптар арасында жоғары деңгейде тұрақты әрі сындарлы саяси диалог орнаған, – деп атап өтті депутат Дана Медеуова.
Кездесуде парламентаралық ынтымақтастықты нығайтуға, салалық комитеттер, достық топтары мен парламенттік делегациялар арасындағы байланыстарды жандандыруға ерекше назар аударылды.
Осыған байланысты тараптар 27-28 қазанда Астанада өткізу жоспарланған «Қазақстан Республикасы – Еуропалық Одақ» Парламенттік ынтымақтастық комитетінің алдағы 23-ші отырысын талқылады.
Өз кезегінде елші Алешка Симкич Қазақстанның Еуропалық Одақтың Орталық Азиядағы негізгі серіктестерінің бірі екенін атап өтіп, екіжақты ынтымақтастықты одан әрі нығайтудың маңыздылығына тоқталды.
Кездесу қорытындысы бойынша тараптар сындарлы диалогты жалғастыруға және Қазақстан мен Еуропалық Одақ арасындағы серіктестікті, оның ішінде парламентаралық өзара іс-қимыл бағытында одан әрі дамытуға мүдделі екендерін жеткізді.