Qazaq24.com, Inform.KZ дереккөзінен алынған мәліметтерге сүйене отырып ақпарат бөліседі..
Осы аптада ашылған Бейжің автосалоны әлемдегі ең ірі автокөлік нарықтары — Қытай мен АҚШ арасындағы баға алшақтығының ауқымын айқын көрсетті.
Ішкі бәсеке жағдайында Қытайдағы жаңа көліктердің құны басқа нарықтардың көпшілігінде қолжетімсіз деңгейге дейін төмендеді.
Kelley Blue Book мәліметтері бойынша наурызда АҚШ-та жаңа көліктің орташа бағасы 51 456 доллар болды. Ал Қытай нарығы, DCar платформасына сәйкес, бағасы 25 000 доллардан төмен 200-ден астам электр және гибридті модельдерді ұсынады.
Reuters агенттігінің DCar деректері негізінде жүргізілген талдау Қытайдағы ең көп сатылатын бес электромобильдің бағасы АҚШ-тағы бір орташа көліктің бағасына тең екенін көрсетті. Бұл модельдер АҚШ автосалондарында әзірге сатылмайды және жақын арада сатылымға шықпауы да мүмкін.
Олардың арасында Қытайда ең көп сатылатын модельдердің бірі — бағасы шамамен 10 060 АҚШ долларынан басталатын Geely EX2 компактты электромобилі бар. Сондай-ақ, қалалық сапарларға арналған бюджеттік Wuling Hongguang Mini EV бағасы 6 560 АҚШ долларынан басталады.
Атап өтуге тұрарлық тағы үш модель — BYD компаниясының Seagull, Yuan UP және Qin Plus DM электромобильдері. Олардың бағасы шамамен 10-12 мың доллардан басталады. BYD соңғы жылдары Қытайдың арзан электромобильдер нарығында жетекші болып отыр. Компания көліктің бірнеше жүз мыңын сатқан.
Сарапшылар бұл баға айырмашылығы АҚШ нарығында тек ұлғая беруі мүмкін деп отыр.
Осыған дейін Бейжіңде әлемдегі ең ірі халықаралық автокөрме ашылғаны туралы жазған болатынбыз.