Sputnik.KZ парақшасындағы ақпаратқа сәйкес, Qazaq24.com хабар таратты..
АСТАНА, 30 маусым – Sputnik. Ресей мен Беларусь БҰҰ-ны Беларусь балалары мінген автобусқа жасалған соққыны қатаң әрі нақты айыптауға шақырды.
Ресейдің БҰҰ жанындағы тұрақты өкілінің міндетін атқарушы Анна Евстигнеева БҰҰ Қауіпсіздік Кеңесінің отырысында Ресейдің ұйым басшылығынан бұл шабуылды ашық айыптауды талап ететінін мәлімдеді.
"Біз БҰҰ Бас хатшысынан, Хатшылықтан және ұйымның салалық құрылымдарынан осы қылмысты ешбір екіұшты талқылаусыз айыптауды талап етеміз. Көптеген баланың зардап шегуіне әкелген Киевтің нысаналы шабуылдарын елемеу – БҰҰ Жарғысының 100-бабын өрескел бұзатын қосарланған стандарттардың айқын көрінісі", – деді ол.
Беларусьтің БҰҰ жанындағы тұрақты өкілі Валентин Рыбаков та халықаралық қауымдастықты балаларға жасалған соққыны сөзсіз айыптауға шақырды.
"Беларусь Республикасы бұл адамшылыққа жат террористік актіні қатаң айыптайды және халықаралық қауымдастықты оны ешқандай шартсыз айыптауға үндейді. БҰҰ Қауіпсіздік Кеңесін аталған қылмысқа жан-жақты әрі толыққанды құқықтық баға беруге шақырамыз", – деді Рыбаков.
Оның пікірінше, Беларусь азаматтары мінген автобусқа жасалған соққы қақтығысты ушықтыруға және Беларусьті Ресей мен Украина арасындағы қарулы қақтығысқа тартуға бағытталған.
"Беларусь автобусына соққы жасағандар мұны әдейі әрі арандатушылық мақсатпен жүзеге асырды. Мұндай әрекеттер қақтығысты саналы түрде ушықтыруға және Беларусьті Ресей мен Украина арасындағы қақтығысқа тартуға бағытталған. Бұл – Беларусь пен Украина арасындағы шиеленісті күшейтіп, елімізді соғысқа араластыруға жасалған әрекет", – деді ол.
17 маусым күні Брянск облысында Беларусьтен Геленджикке бет алған автобусқа дрон шабуыл жасағаны хабарланды. Автобуста 44 адам, оның ішінде 28 бала болған.
Шабуыл салдарынан жүкті әйел қаза тауып, оның жұбайы ауыр жарақат алған. Бұдан бөлек тағы алты адам, соның ішінде төрт бала зардап шекті.