Qazaq24.com, Arasha.KZ дереккөзінен алынған ақпаратқа сүйене отырып жаңалық таратады..
Танымал стендап-комик Нұрлан Сабуров Ресейге 50 жылға кіруге тыйым салынғаннан кейін алғаш рет мәлімдеме жасады, деп хабарлайды Arasha.kz.
Өнер иесі қазіргі жағдайға қатысты түсініктеме бермейтінін атап өтті. Оның айтуынша, бұл мәселемен тиісті органдармен жұмыс істейтін заңгерлер айналысады, ал уақыт бәрін өз орнына қояды.
"Айтарым мынау: менің стендап-комик ретіндегі жолым 15 жыл бұрын Екатеринбург қаласында басталып, кейін Мәскеуде жалғасты. Осы жылдар ішінде Ресейдің көптеген қаласында болдым. Барлық жерде мені жылы әрі достық көңілмен қарсы алды. Шығармашылық тұрғыда дамуға мүмкіндік берген, әртіс ретінде қалыптасуыма жол ашқан елге алғысым шексіз. Ресейде де, оның шегінен тыс жерлерде де көпұлтты көрермен жинауыма себеп болған жандардың барлығына рақмет", – деп жазды Сабуров.
Сондай-ақ ол журналистерге, блогерлерге және бұқаралық ақпарат құралдарына арнайы үндеу жолдады.
"Отбасымның жеке өміріне – жұбайыма, балаларыма, ата-анама және жақындарыма құрметпен қарауларыңызды сұраймын. Баршаңызға жақсылық тілеймін", – деді комик.
Айта кетейік, бұған дейін, жұма күні 6 ақпанда, қазақстандық комик Нұрлан Сабуровқа 30 қаңтардан бастап Ресей аумағына 50 жылға кіруге тыйым салынғаны белгілі болған еді. Бұл шешім "елдің ұлттық қауіпсіздігі мүддесінде, заңнаманы сақтау және дәстүрлі рухани-адамгершілік құндылықтарды қорғау мақсатында" қабылданғаны хабарланған.