Sputnik.KZ парақшасынан алынған ақпаратқа сәйкес, Qazaq24.com хабарлайды..
АСТАНА, 21 тамыз – Sputnik. Мәдениет және ақпарат министрлігі сайлауалды үгіт-насихат кезінде анықталған заң бұзушылықтардың санын жариялады, деп хабарлайды Sputnik Қазақстан тілшісі.
Вице-министр Қанат Ысқақовтың айтуынша, бұқаралық ақпарат құралдарында партиялар туралы ақпарат тең дәрежеде жарияланады. Ал үгіт-насихат материалдарының көп немесе аз болуы әр партияның қаржылық мүмкіндігіне байланысты. Сондықтан кейбір партиялар БАҚ-қа емес, әлеуметтік желілерге басымдық береді.
Сайлауалды науқан басталғалы бері сайлау заңнамасын бұзудың 21 фактісі анықталған.
"Заң бұзушылықтардың басым бөлігі қоғамдық пікір мен сауалнама нәтижелерін жариялауға тыйым салынған кезеңде осындай материалдарды орналастыруға байланысты болды. Яғни, біз әлеуметтік сауалнамаларды әлі де дұрыс жүргізіп отырған жоқпыз", — деді Ысқақов ОСК-ның бүгінгі отырысында.
Қалған заң бұзушылықтар үгіт-насихат материалдарын дұрыс таңбаламауға немесе мүлде таңбасыз жариялауға байланысты болған.
Дегенмен 2023 жылғы парламенттік сайлау алдындағы үгіт-насихатпен салыстырғанда заң бұзушылықтардың саны айтарлықтай төмендеген. Ол кезде 151 факт анықталған. Министрлік осы жолы заң бұзушылықтардың азаюын БАҚ-тың кәсіби деңгейінің өсуімен және "Заң мен Тәртіп" қағидатының сақталуымен байланыстырып отыр.