Qazaq24.com, Egemen.KZ дереккөзінен алынған мәліметтерге сүйене отырып ақпарат бөліседі..
Мемлекет басшысы Қасым-Жомарт Тоқаевтың халыққа Жолдауында ауылдық елді мекендерді сапалы ауызсумен қамтамасыз ету жөнінде тапсырмалар берілген. Белгіленген тапсырманы орындау мақсатында Жаңаарқа ауданында бірқатар маңызды жоба жүзеге асырылды.
Нақты айтқанда, Ералиев ауылдық округіне қарасты 189 разъезд және Ақбастау елді мекендерінде ауызсу желілерін тарту жобасы толық аяқталды. Жобаның жалпы құны 451,9 млн теңгені құрап, қаржыландыру облыстық бюджет пен арнайы мемлекеттік қор есебінен жүргізілді. Құрылыс жұмыстарын «Жаңаарқа-2006» ЖШС атқарды.
Жоба нәтижесінде 224 тұрғын мен 56 үй сапалы ауызсумен қамтылды. Су жүйесін салу барысында халықты тұрақты әрі санитарлық қауіпсіз сумен қамтамасыз етуге бағытталған заманауи технологиялық және сәулет-құрылыс шешімдері қолданылды. Нысандар гидрооқшаулағышы бар монолитті темірбетон негізінде салынды, ішкі коммуникациялар коррозияға төзімді материалдардан жасалып, авариялық ағызу және дренаждық сорғылармен жабдықталды. Сонымен қатар желінің жекелеген учаскелеріне қызмет көрсетуге арналған камералар, құдықтар және бақылау-өткізу пунктері орнатылды.
Сонымен қатар Ералиев ауылдық округіне қарасты Жомарт стансасында да ауызсу құбыры желілерін салу жұмысы толығымен аяқталды. Жобаның құны 449,4 млн теңгені құрайды. Оны облыстық бюджет пен арнайы мемлекеттік қор қаржыландырды. Құрылыс жұмысын «Жаңаарқа-2006» ЖШС орындады.
Нәтижесінде, стансадағы 120 тұрғын мен 30 үй тұрақты әрі сапалы ауызсуға қол жеткізді. Жобаны іске асыру барысында заманауи инженерлік шешімдер қолданылып, су жүйесінің қауіпсіздігі мен сенімділігі қамтамасыз
етілді.
Аталған жобалардың толық аяқталуы өңірдің әлеуметтік инфрақұрылымын дамытып, ауыл тұрғындарының таза ауызсуға қолжетімділігін қамтамасыз етті.
Ұлытау облысы