Qazaq24.com, Arasha.KZ дереккөзінен алынған ақпаратқа сүйене отырып мәлімет бөліседі..
Бокстан Олимпиада чемпионы, Қарағанды облыстық дене шынықтыру және спорт басқармасының басшысы Серік Сәпиев өзінің орынбасарымен болған келіспеушілікке қатысты түсініктеме берді. Ол өзінің хабарынсыз аймақтағы спорт ұйымдарының басшыларын заңсыз ауыстыру әрекеттері болғанын айтты, деп хабарлайды Arasha.kz.
«Мәселенің анық-қанығын айтайын: бұл жағдай жеке бас араздығы немесе тұрмыстық жанжал емес. Әңгіме өңірде бейресми ықпалы бар белгілі бір тұлғалардың қарсылығы туралы болып отыр. Менің келісімімсіз облыстағы спорт ұйымдарының басшыларын заңсыз ротациялау әрекеттері жасалды. Мұны білген бойда, мен жағдайды бейбіт жолмен тоқтатуға тырыстым. Ашық мәлімдеймін: Мемлекет басшысы талай рет айтқан қазақстандық спорттағы жүйелі реформаларды жүзеге асыруға деген жігерімді ешқандай арандатушылық жасыта алмайды. Баршаңызға рақмет», — деп атап өтті Сәпиев.
Оның айтуынша, бұл оқиғаға орынбасарларының бірінің қатысы болған.
Еске сала кетейік, Серік Сәпиев пен оның орынбасары арасындағы оқиға 21 қаңтарда орын алды. Бұған дейін желіде Сәпиев пен оның орынбасары Есімхановтың арасында төбелес болғаны туралы ақпарат тараған болатын.
Кейінірек тараптар жанжалдың шешілгенін және жұмыс мәселелері қызметтік тәртіппен реттелгенін хабарлады.