Aikyn.KZ парақшасынан алынған ақпаратқа сүйене отырып, Qazaq24.com хабарлама жасады..
Қазіргі жастар үшін халықаралық тәжірибе жинақтап, әлемнің жетекші университеттерінде білім алу – арман ғана емес, нақты мүмкіндікке айналып келеді.
Осындай мүмкіндіктердің бірі Сәтбаев университеті жанындағы City University of Hong Kong (CityUHK) филиалының 2026–2027 оқу жылына талапкерлерден құжат қабылдауды бастауы. Биыл талапкерлерге халықаралық деңгейдегі білімді мемлекеттік грант негізінде игеруге жол ашылып отыр. Жалпы саны 110 мемлекеттік білім гранты бөлінген. Оның ішінде 90 грант бакалавриатқа, 20 грант магистратура бағдарламаларына арналған.
Бұл жоба Қазақстанның жетекші инженерлік жоғары оқу орындарының бірі – Сәтбаев университеті мен әлемдегі беделді зерттеу университеттерінің бірі – City University of Hong Kong арасындағы стратегиялық академиялық серіктестіктің нәтижесі. Серіктестік қазақстандық жастарға өз елінде сапалы инженерлік білім алып, кейін халықаралық академиялық ортада білімін жалғастыруға мүмкіндік береді.
City University of Hong Kong – QS World University Rankings 2026 халықаралық рейтингі бойынша әлемнің ТОП-52 үздік университетінің қатарында және Азиядағы жетекші жоғары оқу орындарының бірі. Университет ғылыми зерттеулерімен, инновациялық жобаларымен, жоғары технологиялық зертханаларымен және заманауи білім беру бағдарламаларымен әлемдік білім кеңістігінде кеңінен танылған.
Ал Сәтбаев университеті – Қазақстандағы инженерлік білім мен ғылымның іргелі орталығы. Бір ғасырлық тарихы бар оқу орны мыңдаған инженерлерді, ғалымдар мен өндіріс саласының көшбасшыларын тәрбиелеп шығарды. Университет халықаралық ынтымақтастықты дамытып, студенттердің әлемдік деңгейдегі білім мен ғылымға қол жеткізуіне ерекше көңіл бөліп келеді.
2026–2027 оқу жылында мемлекеттік гранттар төмендегі білім беру бағдарламалары бойынша ұсынылады.
Бакалавриат бағдарламалары:
• Computer Science;
• Civil Engineering;
• Materials Science and Engineering.
Магистратура бағдарламалары:
• Machine Learning & Data Science;
• Construction and Production of Building Materials and Structures;
• Materials Science and Engineering.
Бұл бағдарламалар цифрлық технологиялар, жасанды интеллект, құрылыс инженериясы, жаңа буын материалдары және жоғары технологиялық өндіріс бағыттарында халықаралық деңгейдегі мамандар даярлауға арналған. Аталған салалар бүгінде Қазақстанда ғана емес, бүкіл әлемде ең сұранысқа ие бағыттардың қатарында.
Бакалавриат бағдарламасы халықаралық тәжірибеде кеңінен қолданылатын «2+2» моделі бойынша жүзеге асырылады. Студенттер алғашқы екі жылын Сәтбаев университетінде білім алып, келесі екі жылын City University of Hong Kong университетінің Гонконгтағы кампусында жалғастырады.
Ал магистратура бағдарламасы «1+1» моделі негізінде іске асырылады. Магистранттар бірінші оқу жылын Сәтбаев университетінде, екінші оқу жылын Гонконгтағы кампуста өткізеді.
Мұндай білім беру үлгісі студенттерге халықаралық академиялық ортада білім алып, заманауи зертханаларда жұмыс істеуге, жетекші профессорлар мен ғалымдардың тәжірибесін меңгеруге, сондай-ақ түрлі мәдениеттермен танысып, кәсіби көкжиегін кеңейтуге мүмкіндік береді.
Бағдарламаны табысты аяқтаған түлектер Сәтбаев университеті мен City University of Hong Kong университеттерінің қос дипломын алады. Бұл халықаралық деңгейде мойындалған дипломдар әлемнің жетекші компанияларында еңбек етуге, ғылыми зерттеулермен айналысуға немесе білімін әлемнің беделді жоғары оқу орындарында жалғастыруға жаңа мүмкіндіктер ашады.
Филиал өз қызметінің алғашқы нәтижелерін де көрсете бастады. 2026 жылы алғашқы 5 магистрант оқуын сәтті аяқтайды, ал бакалавриат бағдарламасының 40-қа жуық студенті білімін City University of Hong Kong университетінің Гонконгтағы кампусында жалғастырады. Бұл халықаралық серіктестіктің тиімділігі мен білім беру бағдарламасының жоғары сапасының нақты көрсеткіші.
Қазіргі таңда еліміздің дамуы инженерлік ойлау қабілеті жоғары, ғылыми ізденіске бейім, жаңа технологияларды меңгерген мамандармен тығыз байланысты. Сондықтан халықаралық білім мен тәжірибені игеру – жеке жетістікке ғана емес, елдің ғылыми-технологиялық дамуына қосылатын маңызды үлес.
Әлемдік деңгейдегі білімге ұмтылу – үлкен мақсат. Ал сол мақсатқа бастайтын мүмкіндік өз еліңізде ұсынылып отыр. Білімге құштар, ізденістен қорықпайтын, өз болашағын ғылыммен және инновациямен байланыстырғысы келетін жастар үшін бұл бағдарлама жаңа белестерге жол аша алады.
Оқуға түсу талаптары мен құжат қабылдау тәртібі туралы толық ақпарат Сәтбаев университетінің ресми сайтында жарияланған.