ШҚО да қолға түспейтін сілеусін видеоға түсіп қалды

Қатонқарағай ұлттық паркінің аумағында орнатылған фототұзаққа түнде жүрген сілеусін түсіп қалды, деп хабарлайды Tengri Travel.

"Түнгі кадрлар"

Кадрларды Қатонқарағай ұлттық паркі Instagram-дағы ресми парақшасында жариялады. Фототұзақ сілеусіннің Аршаты орман шаруашылығындағы түнгі серуенін тіркеп алған.

Бейнежазбада жануар өзінің табиғи ортасында еркін жүргенін көруге болады. Алайда камераны байқап қалған сілеусін бірден көзден таса болады.

Instagram-дағы бұл жазбаны көру

Орман шаруашылығы және жануарлар дүниесі комитеті бөліскен жазба (@qazaqormany)

Сілеусін негізінен жалғыз жортып, тасада жүретін жануар болғандықтан, оны табиғат аясында кездестіру оңай емес. Фототұзақтар жабайы жануарлардың өміріне кедергі келтірмей, олардың тәуліктің әртүрлі уақытындағы мінез-құлқын бақылауға мүмкіндік береді.

Парк 2001 жылы 17 шілдеде құрылған. Ол Шығыс Қазақстан облысының Қатонқарағай ауданында орналасқан. Парктің жалпы аумағы 643 477 гектарды құрайды. Парк аумағында құстардың 280-нен астам түрі мекендейді, оның 25 түрі Қазақстанның Қызыл кітабына енген. Олардың ішінде қара дегелек, ителгі, қарақұс, лашын, дала бүркіті, ақбас тырна, сұр тырна және сыңқылдақ аққу бар.

Сондай-ақ паркте сүтқоректілердің 69 түрі бар, оның бесеуі Қазақстанның Қызыл кітабына енгізілген. Олар: қар барысы, манул, Иконников түнжүргісі, тас сусары және алтай тау қойы (арқар).

Парктің ихтиофаунасында балықтың 17 түрі кездеседі, оның бірі - таймен (ақмарқа) -

Қазақстанның Қызыл кітабына енген. Сонымен қатар, мұнда қосмекенділердің үш түрі және омыртқасыздардың 10 мыңнан астам түрі мекендейді. Омыртқасыздардың екі түрі де Қазақстанның Қызыл кітабына енгізілген.

Орман алқаптары парк аумағының шамамен 40 пайызын, яғни 260 580 гектарды алып жатыр. Олардың басым бөлігі қылқан жапырақты ағаштар.

Парктің өсімдіктер әлемінде жоғары сатыдағы тамырлы өсімдіктердің 1000-нан астам түрі және бұталардың 56-дан астам түрі бар. Өсімдіктердің 30-дан астам түрі сирек кездесетін және жойылып бара жатқан түрлерге жатады, олар Қазақстанның және Халықаралық табиғатты қорғау одағының (ХТҚО) қорғалатын тізіміне енген.

Айта кетейік, жақында "Тарбағатай" ұлттық табиғи паркі қонжығын ерткен аюдың сирек кадрларын көрсеткен болатын. Ұлттық парктің мәліметінше, Тянь-Шань қоңыр аюы - табиғи парк аумағында мекендейтін сирек түрлердің бірі. Сондай-ақ ол Қазақстанның Қызыл кітабына енгізілген.

Бізді Google-дың негізгі дереккөздер тізіміне қосыңыз