Qazaq24.com, Arasha.KZ дереккөзінен алынған мәліметтерге сүйене отырып жаңалық жариялады..
«ҚазАвтоЖол» ҰК» АҚ Шығыс Қазақстан облыстық филиалы баспасөз қызметінің мәліметінше, жазатайым оқиға бүгін Алтай ауданының Северное ауылында орын алған, деп хабарлайды Arasha.kz.
Бұл — республикалық маңызы бар «Өскемен – Алтай – Рахман қайнарлары» тас жолының ең күрделі учаскелерінің бірі. Кеше ғана ауа райының қолайсыздығына байланысты мұнда қозғалысқа шектеу қойылған болатын.
Жолды қардан тазалау жұмыстары аяқталғаннан кейін, мамандандырылған жол техникасына техникалық қызмет көрсету кезінде «Қажсервис» ЖШС ШҚО филиалының жүргізушісі ауыр жарақат алды. Жедел жәрдем бригадасы шақырылып, дәрігерлер барын салғанымен, ер адамды аман алып қалу мүмкін болмады.
«Оқиға фактісі бойынша қызметтік тергеу басталды. Арнайы комиссия құрылып, болған жағдайдың мән-жайы мен себептеріне жан-жақты тексеру жүргізілуде. Оқиға орнында құқық қорғау органдары мен прокуратура қызметкерлері жұмыс істеп жатыр, ақпарат уәкілетті мемлекеттік органдарға, соның ішінде еңбек инспекциясына жіберілді. «ҚазАвтоЖол» басшылығы, компанияның облыстық филиалы және «Қажсервис» ЖШС ұжымы қаза тапқан қызметкердің туған-туыстары мен жақындарына қайғырып көңіл айтады. Ол жол саласында 25 жылдан астам еңбек еткен, өз ісінің нағыз маманы еді», — деп атап өтті «ҚазАвтоЖол» ҰК» АҚ филиалынан.
Қаза тапқан қызметкердің отбасына қажетті материалдық және ұйымдастырушылық көмек көрсетілетін болады.