Tengrinews.KZ парақшасынан алынған ақпаратқа сәйкес, Qazaq24.com хабарлайды..
Шымкентте Bingo-37 және Lotoboom онлайн-платформалары арқылы заңсыз ойын бизнесін ұйымдастыруға қатысты қылмыстық істі тергеу аяқталды. Екі онлайн-казиноның жалпы айналымы 3,1 миллиард теңгені құрады, деп хабарлайды Tengrinews.kz тілшісі Қаржылық мониторинг агенттігіне сілтеме жасап.
Ойыншыларды WhatsApp арқылы іздеген
ҚМА мәліметінше, құмар ойынға бейім адамдарға WhatsApp арқылы онлайн ойнау туралы ұсыныстар жіберіліп отырған. Хабарласқаннан кейін ойыншыларға аккаунт ашылып, логин мен пароль берілген, сондай-ақ ақша аудару үшін банктік шот деректері жолданған.
Қаражатты қабылдау және ұтыстарды төлеу үшін 14 дроппердің (ақша операцияларын жүргізу үшін банктік шоттарын берген тұлғалардың) атына ашылған шоттар пайдаланылған.
Табылған табыс қайда жұмсалған?Ұйымдастырушылар қылмыстық жолмен тапқан табысына құны 200 миллион теңгеден асатын мүлік сатып алған. Тізімде BYD Destroyer, LiXiang L6 Max, Chevrolet Monza және SsangYong Rexton автокөліктері, сондай-ақ екі жер телімі бар.
"Сот үкімімен екі тұлға төрт жылға бас бостандығынан айырылды. Аталған мүлік мемлекет пайдасына тәркіленді. Үкім заңды күшіне енген жоқ", - деп хабарлады ҚМА.
Еске сала кетейік, бұған дейін Алматыда бір топ тұлғаның қызметі тоқтатылды, олар ҚМА мәліметінше, заңсыз интернет-казинолардың жұмысын қамтамасыз еткен. Дропперлердің банктік шоттары арқылы ойыншылардан 110 миллион теңгеден астам қаражат түскен.
Бізді Google-дың негізгі дереккөздер тізіміне қосыңыз
Қосу