Qazaq24.com, Tengrinews.KZ дереккөзінен алынған мәліметтерге сүйене отырып жаңалық жариялады..
Солтүстік Арал теңізіндегі су көлемі 23 миллиард текше метрден асты. 2025 жылғы 1 қазаннан бастап бүгінгі күнге дейін Сырдария өзені арқылы теңізге шамамен 1,2 миллиард текше метр су жіберілді, деп хабарлайды Tengrinews.kz Су ресурстары және ирригация министрлігіне сілтеме жасап.
Солтүстік Аралға қанша су келіп жатыр?
Ведомство мәліметінше, қазіргі вегетациялық кезеңде Солтүстік Арал теңізіне секундына 14 текше метр су құйылып жатыр.
Вегетациялық кезеңнің соңына дейін су жіберу көлемін біртіндеп секундына 100-150 текше метрге дейін ұлғайту жоспарланған. Бүгінгі таңда Солтүстік Аралдағы су көлемі 23,4 миллиард текше метрді құрайды.
"Солтүстік Аралды сақтап қалу мақсатында министрлік Сырдария өзенінің бассейніндегі су есебін автоматтандыру және гидротехникалық нысандарды қайта жаңартуды қоса алғанда, бірқатар жобаны жүзеге асырып жатыр. Сондай-ақ іргелес мемлекеттермен өзара іс-қимыл нығайып келеді. Мысалы, өткен жылы Өзбекстан Республикасымен трансшекаралық су нысандарын бірлесіп басқару және ұтымды пайдалану туралы келісімге қол қойылды, бұл он жылдық келіссөздер процесінің нәтижесі", - деді су ресурстары және ирригация бірінші вице-министрі Нұрлан Алдамжаров.
Еске сала кетейік, сәуір айында Президент Қасым-Жомарт Тоқаев Аралды құтқару халықаралық қорының құрылтайшы мемлекеттері басшылары кеңесінің отырысын өткізген болатын. Жиында Тоқаев Солтүстік Аралдың экожүйесін қалпына келтіру бойынша бірлескен жұмыстың оң нәтижелерін атап өтті.
Google News арқылы жаңалықтарымызды қадағалаңыз
Жазылу