Qazaq24.com, Sputnik.KZ дереккөзінен алынған мәліметтерге сүйене отырып ақпарат бөліседі..
АСТАНА, 22 шілде – Sputnik. Ақмола облысының соты экс-министр Қуандық Бишімбаевтың ісі бойынша сотталған Бақытжан Байжановтың неліктен ерте бостандыққа шыққанын түсіндірді, деп хабарлайды Sputnik Қазақстан тілшісі.
Степногорск қалалық сотында Байжановқа қатысты негізгі жазаның өтелмеген бөлігінің мөлшерін қысқарту туралы ұсыныс қаралған.
"Сот Байжановтың Астана қаласының қылмыстық істер жөніндегі мамандандырылған ауданаралық сотының 2024 жылдың 13 мамырындағы үкімімен 4 жылға бас бостандығынан айырылғанын, жазасын орташа қауіпсіздік мекемесінде өтегенін анықтады", - деп жазылған хабарламада.
Ведомствоның мәліметінше "Қазақстан Республикасының жаңа Конституциясының қабылдануына байланысты рақымшылық жасау туралы" заңының 2-бабы 4-тармағына сәйкес, ауыр немесе аса ауыр қылмыс жасағаны үшін сотталған, тәртібі теріс деп бағаланбаған және рақымшылық шарасы қолданылатын кезеңде жазасын өтеу мерзімінің аяқталуына бір жылдан аспайтын уақыт қалған адамдарға негізгі жазаның өтелмеген бөлігі қысқартылады.
Сотталушының өтелмеген жаза мерзімі – 3 ай 18 күн.
"Сот отырысында сотталған Байжанов рақымшылық жасау актісін қолдануға қарсылық білдірмеді. Ол бас бостандығынан айыру орынынан босатылды", - дейді сот.
Қаулы заңды күшіне енген жоқ.