Qazaq24.com, Inform.KZ дереккөзінен алынған мәліметтерге сүйене отырып ақпарат бөліседі..
«Қазгидромет» кәсіпорны облыстық филиалының мәліметінше, Ақмола облысынан келген ағын су есебінен Есіл өзенінің су деңгейі қайта көтеріле бастады. Ғабит Мүсірепов атындағы ауданның Шөптікөл ауылының маңында өзен деңгейі өткен тәулікте 39 см-ге көтерілді. Дружба ауылының маңында 28, ал Тоқсан би ауылының қасында 24 см-ге артты. Сергеевка қаласының жанында бір тәулікте 15 см-ге, ал су қоймасында 8 см-ге жоғарылағаны тіркелді.
Мамандардың айтуынша, екінші толқынның шарықтау шегі болжам бойынша гидрологиялық бекетте сәуір айының соңында өтеді.
Ал Петропавлда Есіл өзенінің су деңгейі түсе бастады. Өткен тәулікте қаладағы су қоймасының деңгейі 6 см-ге төмендеді.
Осыған орай бүгін сағат 11:00-де республикалық маңызы бар KZ15-09 «Петропавл қаласының айналма жолы» автожолының 25-30 шақырым аралығы көліктің барлық түрі үшін ашылады. Бұған дейін Есіл тасып, судың асфальтқа жайылуына байланысты көлік қозғалысына шектеу қойылған еді.