Qazaq24.com, Tengrinews.KZ дереккөзінен алынған ақпаратқа сүйене отырып жаңалық таратады..
Канар аралдарының құрамына кіретін Лансароте аралында Лос-Ахачес табиғи ескерткішінің аумағына көлікпен кіруді шектеу ұсынылды. Жаңа ережелер танымал Папагайо жағажайларына келетін туристерге әсер етуі мүмкін, деп хабарлайды Tengri Travel.
Қандай шектеулер енгізу ұсынылған?
Бұл бастаманы "Нуэва-Канария - Канариялық блок" саяси партиясының өкілі Йоне Карабальо көтерді.
Ол резидент еместерге тиесілі автокөліктердің Лос-Ахачес табиғи ескерткіші аумағына кіруін шектеуді ұсынды. Осылайша, билік бұл табиғи аймақтағы көлік ағынын азайтуды көздеп отыр.
Ұсынысқа сәйкес, туристерге онлайн-жүйе арқылы келу уақытын алдын ала брондау қажет болуы мүмкін. Сондай-ақ қорғалатын аумаққа кіре берісте QR-кодты тексеру тәртібі енгізілуі ықтимал.
Шектеулер Лансаротенің ең танымал табиғи көрікті жерлерінің бірі - Папагайо жағажайларына келетін саяхатшыларға қатысты болуы мүмкін.
Кіруді шектеудің себебі неде?Карабальоның айтуынша, көлік қозғалысының қарқындылығы табиғи ландшафтқа қосымша салмақ түсіреді. Сонымен қатар туристік маусымның қызған шағында жергілікті тұрғындардың жағажайларға жетуі қиындай түседі.
Саясаткер Канар аралдарының үкіметіне парламенттік сауал жолдап, көлік ағынының қоршаған ортаға тигізетін әсері туралы мәселе көтерді.
Қазіргі уақытта бұл тек ұсыныс түрінде ғана қарастырылып жатыр. Шектеулер енгізу туралы нақты шешім қабылданған жоқ, сондай-ақ ықтимал өзгерістердің мерзімі де белгісіз.
Канар аралдары - Атлант мұхитында, Африканың солтүстік-батыс жағалауында орналасқан, сегіз негізгі аралдан тұратын испан архипелагы. Жұмсақ климатының арқасында туристер мұнда жыл бойы, тіпті көптеген Еуропа елдерінде күн суытатын қыс мезгілінде де ағылып келеді.
Архипелаг тек жағажайларымен ғана емес, сонымен қатар ерекше жанартаулық пейзаждарымен, құмды шағылдарымен, жасыл ормандарымен және ұлттық парктерімен баурап алады. Мұнда серфинг, дайвинг, жаяу жорықтар және жұлдызды аспанды бақылау өте танымал. Әр аралдың өз ерекшелігі бар: мысалы, Лансароте жанартаулық ландшафттарымен белгілі болса, Фуэртевентура созылып жатқан жағажайларымен және су спорты түрлеріне қолайлы жағдайларымен танымал.
Тағы оқыңыз: Норвегия, Исландия және Фарер аралдары саяхатшыларға тегін баспана ұсынады
Бізді Google-дың негізгі дереккөздер тізіміне қосыңыз
Қосу