Таяу Шығыстағы қақтығыс Дубай туризміне қалай әсер етті

Соңғы жиырма жылда Дубай әлемдегі жетекші туристік орталықтардың біріне айналды. Өткен жылы эмиратқа шамамен 20 миллион шетелдік турист келген. Алайда Таяу Шығыстағы қақтығыс басталғалы бұл қарқынды өсім күрт баяулады.

Қақтығыс басталғалы бері БАӘ-де мыңдаған тұрақты әуе рейстері тоқтатылып, өңірдегі ең жүктемесі жоғары көлік тораптарының бірі — Дубай халықаралық әуежайының жұмысына әсер етті. Өткен жылы бұл әуежай 95,2 миллион жолаушыға қызмет көрсеткен.

Қазіргі таңда кейбір рейстер қайта жанданып жатыр: Emirates ұлттық әуе тасымалдаушысы қысқартылған кестемен ұшуларды орындап, бағыттар желісін толық қалпына келтіруге күш салып жатыр.

Алайда туристер ағынының азаюына байланысты қонақүйлердегі бронь саны күрт төмендеді.

Wego туристік компаниясының коммерциялық директоры Мамун Хмиденнің айтуынша, қақтығыс басталғаннан кейін бірнеше апта ішінде Дубай қонақүйлерінің толу деңгейі әдеттегі көрсеткіштің небәрі 15–20%-ына дейін түскен.

Осыған жауап ретінде қонақүйлер, әсіресе Рамазан айының аяқталуына орай, жергілікті тұрғындарды тарту үшін үлкен жеңілдіктер ұсынды. Палм-Джумейра ауданындағы кейбір люкс қонақүйлер бағаларын екі есеге дейін төмендеткен.

— Қазіргі белгісіздік барлығына әсер етіп отыр. Егер соғыс жақын арада аяқталса, қалпына келу жылдам болуы мүмкін. Ал егер ұзаққа созылса, жазғы маусымды толық қайта қарауға тура келеді, — деді Хмиден.

Кейбір қонақүй желілері жоспарлы жөндеу жұмыстарын алға тартып, нысандарының бір бөлігін уақытша жапқан. Әдетте мұндай тәжірибе тыныш жаз айларында қолданылатын.

226 мыңнан астам бронь жойылды

Қысым іскерлік қонақүйлерге де әсер етті. Дубай — ірі конференциялар мен іс-шаралар орталығы болғандықтан, ұйымдастырушылар көптеген жиынды кейінге қалдырып немесе мүлде тоқтатып жатыр. Majestic Hotels компаниясы үш қонақүйдегі шамамен 450 нөмірдің толуы рекордтық төмен деңгейге түскенін хабарлады.

Компания өкілі Варун Радждың айтуынша, сәуірден кейінгі кезеңге жоспарланған сапарлар жаппай тоқтатылып жатыр, ал көптеген іс-шаралар кейінге шегерілген.

AirDNA аналитикалық компаниясының мәліметінше, 28 ақпан мен 29 наурыз аралығында, яғни қақтығыстың алғашқы айында, БАӘ бойынша 226 500-ден астам қысқа мерзімді бронь жойылған.

Туризмнің құлдырауы Дубайдағы қонақжайлық саласында жұмыс істейтін еңбек мигранттарына да әсер етті. Сұраныс төмендеген сайын көптеген қызметкердің жұмыс уақыты қысқартылып немесе олар ақысыз демалысқа жіберілген.

Сарапшылардың бағалауынша, биыл Таяу Шығыс елдері 23–38 миллион туристен қағылуы мүмкін. Ал туризмнен түсетін табыс 34–56 млрд доллар аралығында азаюы ықтимал.

Осы аптада Дубай билігі туризмді қоса алғанда, бизнесті қолдау үшін алдағы 3–6 айға 272,26 млн доллар бөлетінін мәлімдеді. Сонымен қатар қонақүйлерге туристік салықты уақытша кейінге қалдыруға рұқсат берілді.

Бұған дейін Дубайда құлаған сынықтар салдарынан сегіз адам жарақат алғаны хабарланған еді. Сондай-ақ Air Astana әуе компаниясы Дубайға рейстерді тоқтатуды сәуір айының соңына дейін ұзартқан.