“Тепкілеп, күшікті буындырды“ Алматыда өтіп бара жатқан адамдар әйелден итті тартып алды

Алматыда күшікке қатыгездік көрсеткен әйел кім екені анықталып жатыр. Куәгерлер оның жануарды соғып, тепкенін, ал қала тұрғындары күшікті тартып алмақ болғанда, оладың бірін сол күшікпен ұрғанын айтады, - деп хабарлайды Tengri Life.

"Күшікті ұрып, қылқындырған"

Әлеуметтік желілерде жануарға жасалған қатыгездік туралы бірнеше жазба тарады. Алдымен автобуста түсірілген кадрлар жарияланды. Жазба авторы әйелдің итті қорлағанын айтады.

"Бұл не деген сұмдық. Қыз итті қинап тастапты, ол су болып кеткен, кір-қожалақ, қатты қиналғаны көрініп тұр. Жануарға қалай олай қарауға болады? Ол балағат сөздер айтып, итке "фас" деп бұйырады. Иттің өзін қорғауға қауқары жоқ - тек төзуден басқа амалы жоқ. Ит байғұсты қатты аяп кеттім", - деп жазды жазба авторы.

Скриншот: Threads

Кейінірек әлеуметтік желілерде әлгі әйел мен күшік түсірілген тағы бір видео пайда болды. Кадрлардан әйелдің жануарды сілтеп, ескерту жасаған жігітті сол күшікпен ұрмақ болғанын көруге болады. Куәгерлердің айтуынша, ол үй жануарын ұрып-соғып, тұншықтырған.

"Әйелдің күшікті теуіп, қылқындырып жатқанын көрдік. Жануарға бұлай істемеуін өтінгенімізде - өз итім, қаласам өлтіремін деп жауап берді. Содан кейін бізді күшікпен ұрмақ болды", - деп жазды жігіттер Threads парақшасында.

Скриншот: Threads

Ақыры жастар күшікті тартып алған. Оны ветеринарға апарды.

Алматы Полиция департаменті әлеуметтік желілерде тараған видеожазба бойынша Әуезов аудандық басқармасының қызметкерлері тексеру жүргізіп жатқанын хабарлады.

"Кадрларда өтіп бара жатқан адаммен жанжал кезінде қолындағы итті пайдаланған әйелдің әрекеті тіркелген. Осыған байланысты оқиғаға қатысушылардың жеке басы мен барлық мән-жайы, соның ішінде жануарға қатысты іс-әрекеттер анықталып жатыр", - деп мәлімдеді ведомство.

ПД тексеру нәтижелері бойынша әйелдің іс-әрекетіне құқықтық баға беріліп, тиісті процессуалдық шешім қабылданатынын айтты.

Полиция жануарларға қатыгездік көрсетуге жол берілмейтінін еске салды. Әрбір адам оларға ізгілікпен және жауапкершілікпен қарауға, оларға зиян келтіретін немесе азаптайтын әрекеттер жасамауға міндетті.

Бұған дейін қазақстандықтар әлеуметтік желіде ер адамның TikTok-тағы тікелей эфиріне жаппай шағымданған болатын. Эфир кезінде ол мысықты қорлаған. Ер адам анықталып, полиция бөліміне жеткізілді. Ол Жамбыл облысының 43 жастағы тұрғыны болып шықты. Оған айыппұл салынды.

Бізді Google-дың негізгі дереккөздер тізіміне қосыңыз