Туристер Алматыдағы анық емес мәселеге тап болды

Алматы тұрғыны әлеуметтік желіде шетелдік туристердің жолақы төлеудегі қиындықтарына шағымданды. Оның айтуынша, қала қонақтарына қоғамдық көлік жүйесін түсіну оңай емес: автобустарда қолма-қол ақша қабылданбайды, ал кейбір төлем түрлерінде шектеулер бар. Tengri Travel қала әкімдігінен туристер үшін қандай төлем нұсқалары қолжетімді екенін білді.

Алматы тұрғыны әлеуметтік желіде шетелдік туристердің жолақы төлеудегі қиындықтарына шағымданды. Оның айтуынша, қала қонақтарына қоғамдық көлік жүйесін түсіну оңай емес: автобустарда қолма-қол ақша қабылданбайды, ал кейбір төлем түрлерінде шектеулер бар. Tengri Travel қала әкімдігінен туристер үшін қандай төлем нұсқалары қолжетімді екенін білді.

Талқылауға әлеуметтік желілердегі жазба түткі болған. Ол тез арада 100 мыңға жуық қаралым жинады. Жарияланым авторы қолданыстағы жүйенің шетелдіктерге бейімделмегеніне назар аударды.

"Алматыда автобустарда қолма-қол ақша қабылданбаса, ал "Оңай" тек қазақстандық нөмірге тіркелген болса және бір адам үшін тек бір рет төлеуге мүмкіндік берсе, туристер жолақыны қалай төлеуі керек?" - деп сұрады жазба авторы.

Скриншот: Threads

Желі қолданушыларының пікірі екіге бөлінді: бірі автобус картасын сатып алу - көптеген елдегі қалыпты тәжірибе десе, енді бірі төлем процесін бұдан да ыңғайлы ету керек деп есептейді.

"Пікір жазғандар "турист" деген сөздің мән-мағынасын түсінбей отыр. Оларда банк карталары, жергілікті сим-карталар, тіпті шетелде жұмыс істейтін карталар болмауы мүмкін! Оларда тек қолма-қол ақша мен шетелдік нөмірдегі роуминг қана бар. Ал аялдамаларда ешқандай ақпарат жоқ! Автормен келісемін - бұл маңызды мәселе", - деп пікір білдірді желі қолданушыларының бірі.

Кейбір қолданушылар мұндай қиындықтарға өздері де тап болғанын айтып берді.

"Көптеген елде "Оңай" сияқты карталарды сатып алу керек, сондықтан бұл тек бізде емес. Аустралияда карта 6 аустралиялық доллар тұрады. Қазір үйде жатыр, амалсыз алғанмын. Ештеңе етпейді, бәріміз солай жүреміз. Оның үстіне, қазір әр қоғамдық көлікке банк картасына арналған жаңа терминалдар орнатылды. Жақында іске қосылады", - деді желі қолданушысы.

Мәселен, Оңтүстік Кореядан келген туристер Алматыдағы қысқа сапары кезінде QR-код арқылы екі адамға бірдей жолақы төлей алмағандарын айтып бөлісті.

"Сәуірде Сеулден ұшып келіп, Алматыны көру үшін 3 күнге қалдық. Бір рет қоғамдық көлікке мінуді жөн көрдік, бізде бір ғана сим-карта болды. QR арқылы төлем жасадық, бірақ екінші рет төлеу мүмкін болмады. Қолма-қол ақша қабылдамайды, ештеңе түсініксіз, жол жүру картасын қайдан сатып алу керек екені белгісіз, ал бір ғана сапар үшін оны іздеудің де мәні жоқ", - деп жазды пікір қалдырушылардың бірі.

Басқалары болса, кез келген елге барар алдында жергілікті көлік ережелерін алдын ала зерттеп, SIM-карта сатып алу қажеттігін атап өтті.

"Басқа елге барғанда бірінші кезекте сим-карта сатып аламын. Ұшар алдында сол елді зерттеп, көлігі туралы көп оқимын: қайда және қалай жету керек, "сәлеметсіз бе" және "рақмет" деген базалық сөздерді үйренемін. Бізге ағылшынша сұрай алмайтын немесе автобустағы жапсырмалардан СМС арқылы төлеуге болатынын оқи алмайтын дәрменсіз адамдар келе ме?" - деді желі қолданушыларының бірі.

Біз пікір алу үшін қалалық әкімдіктің баспасөз қызметіне хабарластық. Онда Алматы автобустарында қолма-қол ақшамен есеп айырысудың шынымен де жоқ екенін растады.

"Бұл ретте жолаушыларға ыңғайлы болу үшін баламалы төлем түрлері қолжетімді - банк картасы, мобильді қосымшалар, QR-код, сондай-ақ көлік картасы арқылы төлеуге болады", - деп түсіндірді әкімдіктегілер.

Сонымен қатар әкімдік "Оңай" картасын сатып алу немесе төлем жасау үшін мобильді қосымшаларды пайдалануға қазақстандық телефон нөмірі міндетті емес екенін ерекше атап өтті.

Google News арқылы жаңалықтарымызды қадағалаңыз