Qazaq24.com, Tengrinews.KZ дереккөзінен алынған мәліметтерге сүйене отырып жаңалық жариялады..
Түркия, Сауд Арабиясы және Пәкістан қорғаныс саласында жаңа үшжақты келісімге қол қойды. Құжат осы үш елдің біріне қарулы шабуыл жасалған жағдайда өзара қолдау көрсетуді қарастырады, - деп хабарлайды Tengrinews.kz тілшісі Clash Report мәліметіне сілтеме жасап.
Келісімде не қарастырылған?
Құжат ресми түрде "Мекке келісімі" деп аталды. Оның негізгі тармағы ұжымдық қорғаныс туралы ереже болды. Уағдаластыққа сәйкес, үш елдің біріне жасалған қарулы шабуыл барлық үш мемлекетке жасалған шабуыл деп есептеледі.
Келісім ықтимал агрессияға ұжымдық тосқауыл қоюды күшейтуге және Түркия, Сауд Арабиясы мен Пәкістанның қорғаныс саласындағы ынтымақтастығын кеңейтуге бағытталғаны атап өтілді.
Түркиялық шенеунік басылымға берген сұхбатында жаңа келісімнің тек қорғаныс сипатында екенін атап өтті. Оның айтуынша, келісім үш елдің тек қорғаныс мақсатында өзара қолдау көрсетуін қарастырады. Сонымен қатар, бұл келісім қандай да бір нақты мемлекетке немесе өзге субъектіге қарсы бағытталмаған.
Сондай-ақ келісімге аймақтағы басқа елдердің де қосылу мүмкіндігі жоққа шығарылмайды.
Түркия, Сауд Арабиясы және Пәкістан арасында қандай байланыс бар?Исламабад пен Эр-Рияд экономика және қорғаныс саласындағы ынтымақтастықты бұрыннан дамытып келеді. 2025 жылғы қыркүйекте Пәкістан премьер-министрі мен Сауд Арабиясының мұрагер ханзадасы өзара қорғаныс туралы стратегиялық келісімге қол қойды. Құжат әскери ынтымақтастықты нығайтуды және сыртқы агрессия жағдайында өзара қолдау көрсетуді көздейді.
Жаңа келісім Таяу Шығыстағы елеулі тұрақсыздық пен Иран төңірегіндегі шиеленістің күшеюі аясында жасалды. Бұған дейін БАҚ бұл келісім аймақтық қақтығыстар жағдайында үш ірі мұсылман мемлекетінің өзара іс-қимылын нығайтатынын атап өткен болатын.
Бұл ретте елдердің қауіпсіздік саласындағы ұстанымдары мен мүмкіндіктері әртүрлі. Түркия - НАТО мүшесі, Сауд Арабиясы - АҚШ-тың Таяу Шығыстағы негізгі серіктестерінің бірі, ал Пәкістан - ядролық қаруы бар мемлекет.
Google News арқылы жаңалықтарымызды қадағалаңыз
Жазылу