Inform.KZ парақшасындағы деректерге сәйкес, Qazaq24.com ақпарат таратты..
Жалпы алғанда, елдің солтүстік-шығысындағы қорық аймағына Зива мүйізтұмсықтар паналығынан кезең-кезеңімен сегіз жануар көшіріледі. Зива – Угандада ақ мүйізтұмсықтар популяциясын қалпына келтіру үшін арнайы құрылған бірегей қорғалатын аумақ.
Бұрын мүйізтұмсықтар бұл парк аумағында кеңінен мекендеген. Алайда соңғысы 1983 жылы жоғалып кеткен.
Уганданың Жабайы табиғатты қорғау басқармасының (Uganda Wildlife Authority, UWA) атқарушы директоры Джеймс Мусингузи бұл оқиға Кидеподағы мүйізтұмсықтар тарихының жаңа кезеңінің басталғанын атап өтті. Оның айтуынша, билік алдағы уақытта парк аумағында өздігінен көбейіп, тұрақты өмір сүретін популяция қалыптастыруды жоспарлап отыр.
Жануарларды көшіру бірнеше жылға созылған зерттеулерден кейін мүмкін болды. Мамандар мекен ету ортасының жарамдылығын, экологиялық жағдайларды және түрді сәтті қайта бейімдеу үшін қажет қауіпсіздік талаптарын жан-жақты бағалаған.
Парк аумағында қорғалатын арнайы резерват құрылды. Онда периметрлік қоршау, кірме жолдар, табиғатты қорғау мамандары – рейнджерлерге арналған бекеттер, су инфрақұрылымы және мониторинг жүйелері жасақталған. Бұл шаралар жануарлардың қауіпсіздігін қамтамасыз етіп, жаңа ортаға бейімделуіне көмектеседі.
Паркке жеткізілгеннен кейін мүйізтұмсықтар алдымен арнайы дайындықтан өткен рейнджерлер мен ветеринарлық топтардың жіті бақылауында болады. Кейін оларды парктың кеңірек аумақтарына кезең-кезеңімен жібереді.
Сарапшылардың пікірінше, мүйізтұмсықтардың қайта оралуы экологиялық тепе-теңдікті нығайтып, биоалуантүрлілікті сақтау бойынша ұлттық және өңірлік мақсаттарға қол жеткізуге ықпал етеді.
Угандада мүйізтұмсықтар популяциясын қалпына келтіру бағдарламасы 2005 жылы басталған. Ол кезде бұл түр елдің жабайы табиғатынан толық жойылып кеткеннен кейін Зива қорық аймағында жануарларды қолдан өсіру бастамасы іске қосылған еді.
Еске сала кетсек, Моңғолия сирек кездесетін жануарлар мен құстар тізімін жаңартты.