Ұшақ әуежай аумағына құлап, өртенді екі адам қаза тапты

Сан-Диего қаласындағы Монтгомери-Гиббс әуежайында Cessna Skyhawk шағын ұшағы екінші айналымға кетпек болған кезде апатқа ұшырады. Құлағаннан кейін әуе кемесі өртеніп кеткен. Бортта болған екі адам қаза тапты, деп хабарлайды Tengri Travel Fox News-ке сілтеме жасап.

Не болды?

АҚШ-тың Федералды азаматтық авиация басқармасының (FAA) мәліметінше, апат жергілікті уақытпен сағат 17:15 шамасында болған. АҚШ-тың Көліктегі қауіпсіздік жөніндегі ұлттық кеңесінің (NTSB) алдын ала ақпараты бойынша, экипаж екінші айналымға шығуға тырысқан кезде ұшақ әуежай аумағына құлаған.

FAA мәліметінше, құлар алдында ұшақтың сол жақ қанаты күрт төмен түсіп кеткен. Содан кейін әуе кемесі тарту күшін жоғалтып, жерге соғылған болуы мүмкін.

Соққыдан кейін қатты өрт басталған.

Оқиға куәгерлері апат салдарын видеоға түсіріп алған. Кадрлардан ұшақтың толығымен өртке оранғанын көруге болады.

Қатты өрт салдарынан құтқарушылар борттағы адамдарға бірден жете алмады. Өртті сөндіруге Сан-Диего өрт сөндіру-құтқару департаментінің 30-дан астам қызметкері жұмылдырылды.

Қаза тапқан екі адамның аты-жөні әзірге жарияланған жоқ.

Сан-Диегоның Монтгомери-Гиббс муниципалды әуежайында Cessna Skyhawk ұшағы құлап, өртенді. Куәгерлер өрттің тым күшті болғаны соншалық, ешкімнің ұшаққа жақындай алмағанын айтады. Екі адам қаза тапты. pic.twitter.com/WDyHM3kfcy

— Breaking911 (@Breaking911) 9 қыркүйек, 2026 жыл

Оқиға орнына NTSB тергеушісі жіберілді. Мамандар ұшақ пен құлаған жерді тексергеннен кейін, әуе кемесі әрі қарай тергеу жүргізу үшін күзетілетін орынға тасымалданады.

Тергеумен NTSB және FAA айналысады. Олар екінші айналымға шығу кезінде ұшақта не болғанын және оның жерге соғылу себебін анықтауы тиіс.

Бізді Google-дың негізгі дереккөздер тізіміне қосыңыз