Sputnik.KZ парақшасындағы деректерге сәйкес, Qazaq24.com ақпарат таратты..
АСТАНА, 9 шілде – Sputnik. Vietjet Qazaqstan компаниясы "Астана – Омбы – Астана" бағыты бойынша рейстерді уақытша тоқтатуға шешім қабылдады, деп хабарлайды Sputnik Қазақстан.
Бұған дейін Омбыдағы мұнай өңдеу зауытына жаппай шабуыл жасалған болатын. Осыдан кейін әуе кеңістігін пайдалануға шектеу енгізілген.
"Әуе кеңістігін пайдалануға енгізілген кезеңдік шектеулерге және рейстердің қауіпсіз әрі тұрақты орындалуын қамтамасыз ету мүмкіндігі болмауына байланысты Vietjet Qazaqstan “Астана – Омбы – Астана” бағыты бойынша рейстерді 10 шілдеден 20 шілдені қоса алғанда уақытша тоқтатады. Бұл шешім ұшу қауіпсіздігін қамтамасыз ету, сондай-ақ ұзақ кідірістер мен кестедегі өзгерістер қаупін азайту мақсатында қабылданды", – делінген ресми хабарламада.
Осыған байланысты жолаушыларға Омбыға жетудің балама нұсқасы ұсынылды. 14 шілдеден бастап Астанадан Петропавлға ұшып барып, одан әрі автобуспен Омбыға баруға болады. Кері бағытта да жолаушылар тасымалы осы тәртіппен жүзеге асырылады.
Ал рейстер тоқтатылатын кезеңге Омбы бағытына билет алған жолаушылар ақшасын толық қайтара алады. Сонымен қатар, тоқтатылған рейстің әрбір жолаушысына автоматты түрде 10 мың теңгелік ваучер беріледі.