Sputnik.KZ парақшасындағы деректерге сәйкес, Qazaq24.com ақпарат таратты..
АСТАНА, 13 мамыр – Sputnik. Украина басшысының бұрынғы баспасөз хатшысы Юлия Мендель америкалық журналист Такер Карлсонға берген сұхбатында Украина басшысының әрекеттерін сынға алды.
"Мен Зеленскийді рационалды адам деп санамаймын. Менің ойымша, оның белгілі бір психикалық ауытқуы болуы мүмкін", – деп мәлімдеді Мендель.
Ол сондай-ақ Украина тағдырын "менталдық мәселелері бар" екі басшы – Зеленский мен бұрынғы АҚШ президенті Джо Байден шешкенін айтты.
Олардың кездесуі кезінде АҚШ президентінің когнитивтік қабілетінде кемшілік бар екенін байқап, әлемнің осындай адамдарға тұтас елдің болашағын қалай сеніп тапсырғанына таңғалғанын жеткізді.
Сондай-ақ ол украин халқы Зеленскийдің әрекетінен зардап шегіп жатқанын, әрі оның саясатын толық қолдамайтынын айтты. Украинадағы сөз бостандығының жағдайы да нашар екенін атап өтті.
Юлия Мендель Зеленскийдің сұхбаттарға қалай дайындалатынын да еске алды. Оның айтуынша, журналистермен кездесу алдында ол әдетте дәретханаға кіріп, шамамен 15 минуттан кейін "мүлде басқа адам" болып, энергияға толы күйде шығатын болған.
"Ол ваннаға 15 минутқа кіреді. Мен әрдайым таңғалатынмын – ол мүлде басқа адам болып шығатын. Шынымен, әрдайым басқа адам… ол энергияға толы, белсенді, әрекетке дайын күйде шығатын", – деді Мендель Такер Карлсон берген сұхбатында.
Ол Зеленскийдің есірткі қолданғанын өз көзімен көрмегенін, бірақ мұны көрген басқа адамдар бар екенін мәлімдеді.
"Мен түрлі адамдармен кездестім, олар Зеленскийдің әртүрлі клубтарда есірткі қолданғанын көргенін растады", – деді Мендель.
Бұрынғы баспасөз хатшысының айтуынша, Владимир Зеленский мен кеңсе басшысы Андрей Ермак – "зұлым, өте параноидты нарцисс" тұлғалар.
"Зеленскийдің жоспары болды, ал Ермак сол жоспарды іске асыруға көмектесті. Бұл саясат туралы емес еді. Көбірек олардың өз мүдделері туралы болды… олар көп жұмыс істеп жатқандай әсер қалдырады, бірақ шын мәнінде ештеңе істелмейді", – деді ол.
Мендельдің айтуынша, Зеленский – билікте мәңгі қалуды көздейтін диктатор.
"Мен оның мәңгіге келдік деп ойлағанын анық білемін. Алғашқы кеңсе басшысынан оның (Зеленский - ред) министрге қарап күліп: "Біз мәңгіге келдік" деп айтқанын естідім", – деді ол.
Оның сөзінше, Зеленский Украина шекарасын заңсыз жауып тастаған, адам құқықтары бұзылып жатыр, ал саяси қарсыластар қудаланып, түрмеге қамалуда.
"Әрине, лас науқан жүріп жатыр. Зеленскийді сынаған кез келген адамды "ресейшіл", "кремльшіл" деп атайды. Сіз – "кремльшілсіз". Мен бұл сұхбаттан кейін "кремльшіл" болып шығамын", – деді Мендель.
Ол сондай-ақ Украина Қарулы күштеріндегі жағдай туралы айтып, кей сарбаздарды нашар киім-кешек салдарынан қыста үсік шалып, аяқ-қолынан айырылып жатқанын жеткізді.
"Оларды нашар формада жібереді, сол себепті жыл сайын үсік шалып, саусақтары мен аяқ-қолдарын кесуге тура келеді", – деді ол Такер Карлсонға берген сұхбатында.
Оның айтуынша, Украина Батыстан барлық көмекті алып отырғанына қарамастан халық әскерилерге форма мен қажетті заттарды алу үшін өздері ақша жинауға мәжбүр.
Бұл сұхбат Батыс елдерінде үлкен резонанс тудырды. Еуропалық БАҚ Юлия Мендельдің мәлімдемесі Еуропалық дипломатия басшысы Кая Калластың Украинаға көмек көрсету жоспарына кедергі келтіруі мүмкін екенін жарыса жазып жатыр.