Inform.KZ парақшасындағы ақпаратқа сәйкес, Qazaq24.com хабар таратты..
— Жергілікті билік кәсіпорынға электр желісіне қосылуға негізсіз бас тартып, перспективалы инвестициялық жобаның жүзеге асуын тежеген. Нәтижесінде кәсіпкерлік бастаманы бюрократиялық кедергілерден шығару үшін қадағалаушы органдардың араласуына тура келді, — деп хабарлады прокуратурадан.
«Адель» шаруа қожалығы Байзақ ауданында жылына 30 тоннаға дейін балық өсіруге бағытталған ауқымды жобаны іске асыруды жоспарлаған. Бұл жоба өңірді сапалы өніммен қамтамасыз етіп қана қоймай, ауыл тұрғындары үшін жаңа жұмыс орындарын ашуға мүмкіндік бермек еді.
— Алайда жоба дайындық кезеңінде тоқтап қалды. Өндірісті бастау үшін инвестор Қостөбе ауылдық округі әкімдігіне электр желісін тарту және трансформаторға қосу туралы ресми өтініш жасаған. Бірақ атқарушы орган бұл өтінішке заңсыз түрде бас тартқан, — делінген ведомствоның хабарламасында.
Соның салдарынан маңызды жобаның іске асу мерзімі негізсіз созылып, кәсіпкер қаржылық тәуекелдерге тап болды, ал кәсіпорын іс жүзінде тоқтап тұрды.
Мәселе тек Байзақ ауданы прокуратурасының, сондай-ақ ҚР Бас прокуратурасының Инвесторлардың құқықтарын қорғау комитетінің араласуынан кейін ғана шешілді.
Прокуратура тарапынан тиісті шаралар қабылданып, соның нәтижесінде қысқа мерзім ішінде нысанға электр желісі тартылып, инвестор желіге қосылу мүмкіндігіне ие болды.
Қадағалаушы органның мәліметінше, заң бұзушылыққа жол беріп, кәсіпкерлікке жасанды кедергі келтіргені үшін әкімдік қызметкері тәртіптік жауапкершілікке тартылды. Қазіргі уақытта инвестордың құқықтары толық қалпына келтірілді.
Айта кетейік, бұған дейін Ақмола облысында 1,6 млрд теңгенің тиімсіз жұмсалуына жол берілмегені хабарланған болатын. Сондай-ақ Алматы метросының құрылысына бөлінген 127 млн теңге мемлекетке қайтарылды.
Еске сала кетейік, бұған дейін Астана прокуратурасы инвесторларға қатысты 30-дан астам заңсыз шешімді тоқтатқанын жаздық.