Qazaq24.com, Aikyn.KZ дереккөзінен алынған мәліметтерге сүйене отырып ақпарат бөліседі..
Қазақстанда зейнетақы жинақтарын тұрғын үй жағдайын жақсартуға пайдалану көрсеткіші айтарлықтай төмендеді, – деп хабарлайды Aikyn.kz сайты.
Бұл туралы Бірінші несие бюросы мәлімдеді.
2026 жылғы ақпанда тұрғын үй мақсатында 23,8 мың өтініш орындалған. Бұл қаңтармен салыстырғанда 38%-ға аз және 2024 жылғы мамырдан бергі ең төмен көрсеткіш. Төлемдердің жалпы көлемі де қысқарып, 36,8 млрд теңгені құрады (бір айда –28%).
Төмендеудің негізгі себебі – ипотеканы өтеу ережелерінің өзгеруі. Енді Отбасы банктегі ипотеканы зейнетақы қаражатымен тек негізгі қарызды өтеуге ғана пайдалануға болады, ал пайыздық төлемдерді клиенттер өздері төлеуі тиіс.
Сондай-ақ банк қаңтардың соңынан 2 наурызға дейін ипотеканы өтеуге арналған өтініштерді уақытша қабылдауды тоқтатқан. Соның салдарынан қаңтарда 10,7 мың өтініш орындалса, ақпанда небәрі 10 өтініш ғана жүзеге асқан.
Сарапшылар наурызда көрсеткіштер біршама қалпына келуі мүмкін екенін айтады. Алайда жеткіліктілік шегінің көтерілуіне байланысты 2025 жылғы деңгейге жету қиын болуы ықтимал.