Qazaq24.com, Tengrinews.KZ дереккөзінен алынған мәліметтерге сүйене отырып ақпарат бөліседі..
Ақтөбеде 17 жастағы Әлихан Жәнібековтің өліміне қатысты сот үкімі шықты. Шалқардың 18 жастағы тұрғыны қасақана адам өлтіргені үшін кінәлі деп танылды, деп хабарлайды Tengrinews.kz тілшісі.
Қайғылы оқиға биыл 20 наурызға қараған түні Шалқарда болған. Іс материалдарына сәйкес, қаладағы "Маяк" және "Рабочий" аудандарының жасөспірімдері арасында жаппай төбелес болған. Тергеу барысында сотталушы қаруланған пышағымен Әлихан Жәнібековке соққы жасағаны анықталды.
Қылмыс жасалған сәтте сотталушы да, қаза тапқан жасөспірім де 17 жаста болған. Сот процесі кезінде айыпталушы 18 жасқа толды. Ол кінәсін мойындамай, пышақты өзін қорғау мақсатында шығарғанын алға тартты.
Дегенмен сотталушы Жәнібековтің жақындарынан көпшілік алдында кешірім сұрады. Ол жасөспірімді өлтіру ниеті болмағанын айтып сендірді.
Сотта сараптама қорытындысы жарияланды: жарақат жүрек тұсына тиіп, көп қан жоғалтуға әкеп соққан және жасөспірімнің өліміне себеп болған.
"Бұл жарақат денсаулыққа ауыр зиян келтіру санатына жатады, өмірге қауіпті және өлімге әкеп соқтырған. Аталған дене жарақаты өлімнен аз уақыт бұрын - бірнеше секунд немесе минут ішінде салынған. Ол үшқырлы тесуші-кесуші затпен, болжам бойынша пышақпен жасалған. Өлімге әкелген жарақат салынған зат жүзінің ұзындығы кемінде 13 сантиметр, ені 4 сантиметрден аспайды. Өлім жарақат алғаннан кейін бірден жедел қан жоғалту салдарынан болған", - деді іс бойынша прокурор Осман Орынбасар жасөспірімнің қаза болуына қатысты мәліметтерді оқып.
Мемлекеттік айыптаушы сотталушыны 8 жылға бас бостандығынан айыруды сұрады.
ҚАЗІР ТАЛҚЫЛАНЫП ЖАТЫР
“Бостон некесі“. Неге қазақстандық әйелдер бірге тұратын “әйел“ іздейді?
Бүгін 11:02 1
Суретте марқұмның анасы (сол жақта), жәбірленуші тараптың адвокаты (ортада), марқұмның әкесі (оң жақта). Фото: Tengrinews.kz
Қаза тапқан баланың ата-анасы жарыссөз кезінде сотталушыға ең жоғары жаза - 20 жыл беруді талап етті.
"Менің баламның қандай болғанына қараңыздаршы - мейірімді, ақжарқын, ақкөңіл. Қандай баланы өлтіргеніңді сен білесің бе? Жанып тұрған жұлдызды өлтірдің! Жанып тұрған жұлдыздың шоғы үзіліп түсті", - деді сотта марқұм Әлихан Жәнібековтің анасы Рауан Ниязмағанбетова.
Сот айыпталушыны қасақана адам өлтіру бойынша кінәлі деп танып, оны 9 жылға бас бостандығынан айыруға үкім кесті. Бұған қоса, одан жәбірленушілердің пайдасына моральдық шығын ретінде 15 миллион теңге өндірілді.
Фото сот залынан: Tengrinews.kz
Үкім жарияланғаннан кейін жәбірленуші мен сотталушының туыстары сөзге келіп қалды. Жағдай ушығып кеткендіктен, жанжалдың алдын алу үшін полиция қызметкерлері араласуға мәжбүр болды.
Айта кетейік, қаза тапқан Әлихан Жәнібеков отбасындағы үш баланың ортаншысы болған. Мектептен кейін ол ҰБТ-да қажетті балл жинай алмай, кәмелеттік жасқа толған соң алдымен әскери борышын өтеуді, содан кейін оқуын жалғастыруды жоспарлаған екен.
Бізді Google-дың негізгі дереккөздер тізіміне қосыңыз
Қосу