Жедел жәрдем қызметі автокөлік қорын жаңартты

Egemen.KZ парақшасынан алынған деректерге сүйене отырып, Qazaq24.com мәлімдеме жасады..

Шымкент қаласында медициналық жедел жәрдем қызметіне 30 жаңа санитарлық автокөлік кілттері табысталды. Салтанатты іс-шараға қала әкімі Ғабит Сыздықбеков қатысып, денсаулық сақтау саласындағы жедел жәрдем қызметінің рөлін атап өтті.

«Жедел жәрдем – халыққа шұғыл медициналық көмек көрсетудің маңызды саласы. Онсыз денсаулық сақтау саласын көзге елестету мүмкін емес. Қандай жағдай болмасын, адамдарға бірінші болып көмекке ұмтылатын жедел жәрдем қызметінің мамандары. Сондықтан осы сала қызметкерлеріне мүмкіндігінше жағдай жасалуы керек. Бүгінде мемлекет халықтың денсаулығын нығайту мақсатында көп жұмыс атқарып отыр. Соның ішінде мегаполис медицинасы кейінгі жылдары ерекше дамып келеді. Көптеген мекеме жаңа медициналық құралдармен жабдықталды. Дәрігерлер шетелде тәжірибе алмасып, біліктілігін арттырып жатыр. Осының нәтижесінде денсаулық сақтау саласының деңгейі жоғарылады. Шымкент еліміздің медициналық туризміне айналып келеді. Қала мен өңірлерден бөлек, шетелден де Шымкентке келіп емделіп жатқандар бар. Медицина саласының ішінде жедел жәрдем қызметі де кейінгі жылдары ерекше қарқынмен дами бастады. Бұл қызметтің жұмысын оңтайландыру нәтижесінде қазірде жедел жәрдемнің шұғыл көмек көрсетудегі тиімділігі арта түсті. Мемлекет осы бағыттағы жұмысын жалғастырады. Жедел жәрдем қызметі мамандарының біліктілігін күшейту, соңғы үлгідегі құралдармен жабдықтау, медицина қызметкерлерінің қауіпсіздігін қамтамасыз ету қашан да күн тәртібіндегі маңызды әлеуметтік әрі құқықтық мәселенің бірі болып қала береді», деді Ғ.Сыздықбеков.

Мегаполис басшысы сондай-ақ медицина ұйымдары мен шұғыл қызметтердің материалдық-техникалық базасын жаңарту әкімдік жұмысының негізгі міндеттерінің бірі екенін ерекше атап өтті. Соның ішінде жедел жәрдем автопаркін жаңарту – халыққа көрсетілетін шұғыл медициналық көмектің сапасы мен жеделдігін арттырудағы маңызды қадам.

Айта кеткен жөн, «Hyundai Staria» маркалы жаңа санитарлық автокөліктер заманауи медициналық құрал-жабдықтармен толық жабдықталған. Көліктерде кардиографтар, дефибриллятор-мониторлар, өкпені жасанды желдету аппараттары, электрлі сорғыштар, оттегі баллондары, арнайы зембілдер мен қорғаныш қалқандары қарастырылған.

Сонымен қатар салтанатты іс-шара барысында денсаулық сақтау ұйымдарына «Аль-Фараби фарм Лтд» ЖШС демеушілігімен сатып алынған медициналық жабдықтардың арнайы сертификаттары табысталды. Аталған жабдықтар қатарында жаңа туған нәрестелерге арналған инкубаторлар, функционалдық, реанимациялық төсектер бар. Мұндай медициналық құралдар нәрестелердің күтімін жеңілдетуге, ауыр халдегі науқастарға көп жәрдемін тигізуге мүмкіндік береді.

Жауапты мамандар денсаулық сақтау саласын жаңарту мен Шымкент тұрғындарына медициналық қызметтің қолжетімділігін арттыру бағытындағы жүйелі жұмыс тоқтаусыз жалғаса беретінін тілге тиек етті. Бүгінде қалалық медициналық жедел жәрдем қызметі 10 қосалқы станса базасында қызмет көрсетеді. Тәулік бойы тұрғындарға 115 бригада шақыртуларға шұғыл түрде шығып отырады. Медициналық мамандар тобының ішінде 28 дәрігерлік, 87 фельдшерлік бригада бар.

ШЫМКЕНТ

Соңғы жаңалықтар