Qazaq24.com, Sputnik.KZ дереккөзінен алынған мәліметтерге сүйене отырып ақпарат бөліседі..
АСТАНА, 21 сәуір – Sputnik. Астана қаласының қылмыстық істер жөніндегі ауданаралық соты медицина қызметкеріне қатысты күш қолданған ер адамға үкім шығарды.
Сотта анықталғандай, ер адам алкогольдік масаң күйде сауда үйінің автотұрақ аумағында медицина қызметкеріне қатысты күш қолданған. Ол келген жедел медициналық жәрдем бригадасы тиісінше медициналық көмек көрсетпеді деп наразылық білдірген.
Оның заңға қайшы әрекеттерінен фельдшер денсаулығына залал келмегенмен, физикалық ауырсыну келтірілген.
"Сотталушының кінәсі іс материалдарымен дәлелденді. Ер адам өз кінәсін мойындап, бас бостандығынан айырмауды сұрады. Жәбірленуші қатаң жаза тағайындауды сұрады", - деп жазылған хабарламада.
Сот сотталушының бұрын сотталмағанын және жасаған ісіне шын жүректен өкінуін жеңілдететін мән-жайлар деп таныды. Қылмыстың алкогольдік масаң күйде жасалуы ауырлататын мән-жай деп танылды.
Жасалған қылмыстың қоғамдық қауіптілік сипаты мен дәрежесін, сотталушының жеке басын, жәбірленушінің пікірін және істің мән-жайларын ескере отырып, сот ер адамды қылмыстық-атқару жүйесінің ең төменгі қауіпсіздік мекемесінде жазасын өтеумен 1 жыл 6 ай бас бостандығынан айыру жазасын тағайындады.
Сот үкімі заңды күшіне енген жоқ.