Sputnik.KZ парақшасынан алынған деректерге сүйене отырып, Qazaq24.com хабарлама жасады..
АСТАНА, 25 тамыз – Sputnik. Жетісу облысында сел салдарынан республикалық маңызы бар "Сарыөзек – Көктал" жолының кейбір учаскелері бүлінді, деп хабарлайды Sputnik Қазақстан.
"ҚазАвтоЖол" ұлттық компаниясы таратқан мәліметке сәйкес, 24-25 тамыз күндері Панфилов ауданында жауын-шашын көп жауған. Таулы жер бедерінің ерекшелігіне байланысты су ағыны күшейіп, жолдың жекелеген учаскелерін бүлдіріп тастады.
"Лай-тас ағындары жолдың жүру бөлігін кесіп өтіп, кей жерлерде жол жиегі мен жер төсемін шайды, сондай-ақ қоршау элементтері зақымданды. Шағын көпірлер мен су өткізу құрылыстарының маңына лай мен тас жиналып, кейбір су бұру арықтары келген су көлемін толық өткізе алмады", - дейді компания мамандары.
Қазіргі кезде тау беткейлерінен судың аққаны тоқтады. Жолдың жүру бөлігінде су тасу деректері жоқ, судың деңгейі төмендеді. Ал жол қызметтері жауын-шашын салдарын жою жұмыстарына кірісіп кетті. Жолдың жүру бөлігін жол жиектері, су бұру арықтары, шағын көпірлер мен су өткізу құрылыстары лай-тастан тазартылады.
Сонымен қатар шайылған жер төсемі мен жол жиектерін нығайту, су бұру жүйесін қалпына келтіру және зақымданған қоршау элементтерін жөндеу жұмыстары атқарылады.