Жолдау жастар ортасында талқыланды

Жолдауда цифрландыру мен жасанды интеллектіні дамытуға ерекше мән берілген. Осы бағытта «Әділет» партиясы жастардың тех­нологиялық сауаттылығын арттыруға ден қойып отыр. Партия төрағасының орын­басары Ержан Жылқыбаев «Жасампаз AI» жобасын іске асыру көзделгенін атап өтті. Ол кәсіби бағдар беруге, еңбек нарығында сұранысқа ие дағдыларды меңгертуге және жұмысқа орналасуына қолдау көрсетуге бағытталған.

– Біз жастарды жасанды интеллект пен цифрлық технологияларды пайдаланып, кәсіп жүргізуге үйретуді қолға алмақпыз. Басты мақсат – олардың әлеуметтік желіде уақыт өткізумен шектелмей, интернет мүм­кіндіктерін табыс көзіне айналдыруды, жаңа дағдыларды меңгеріп, заман талабына бейімделгені керек, – деді Ержан Жылқы­баев.

Осы ретте Құрылтай депутаты, «Әділет» партиясы фракциясының мүшесі Дидарбек Ділдәбек партияның сайлауалды бағдар­лама­сында 2031 жылға дейін 5 миллион азаматты жасанды интеллект негіздеріне оқыту көзделгенін атап өтті.

– Кез келген саланың соңғы түйіні осы цифр­ландыруға келіп тіреледі. Әсіресе жасанды интеллектіні барынша ұтымды пай­далануымыз керек. Мұның бәрі – мем­­лекетті заман талабына сай дамыту жолында жасалып жатқан қадамдар. Бұл іске өскелең ұрпақ өлшеусіз үлес қоса алады, – дейді ол. 

Құрылтай депутаты, «Әділет» партиясы фракциясының мүшесі Ақерке Искан­дерова өңірлердегі білім беру инфра­құ­ры­лымын дамыту мәселесін көтерді. Ол жастардың ту­ған жерінде сапалы білім алып, кәсіби тұрғы­дан өсуіне жағдай жасау қажет екенін атап өтті.

– Жалпыұлттық құрылыс дегеніміз – құр сөз емес. Енді сапалы инфра­құрылым қал­ып­тастыратын уақыт келді. Бұған еліміздің әлеуеті жеткілікті. Алайда мұндай инфрақұры­лым тек Астана мен Алматыда  емес, барлық өңірде дамуға тиіс. Әрбір жас туған жерінен кетпей-ақ, ірі қалалардағыдай білім алып, кәсіби тұр­­ғыдан дамуға мүмкіндік алуы керек, – дейді Ақерке Искандерова.

Жастар қанаты төрағасының міндетін атқару­шы Ержан Хамитов Президент Жол­дау­ындағы міндеттердің жас ұрпақтың келешегімен тікелей байланысты екенін атап өтті.

– Президент Жолдауында еліміздің алдағы даму бағытына қатысты маңызды міндеттер айқындалды. Соның ішінде білім сапасын арттыру, еңбек нарығын дамыту, цифрлық технологиялар мен жасанды интел­лект мүмкіндіктерін тиімді пайдалану мәселелеріне баса назар аудар­ылды. Бұл бағыттардың әрқайсысы жас-т­ар­дың бүгіні мен бола­ша­ғына тікелей байланысты, – деді Ержан Хамитов.

Кездесу барысында жастар өздерін тол­ғандырған сауалдарын қойып, спи­керлермен ашық пікір алмасты. Диалог алаңы Президент Жолдауындағы міндеттерді жастарға түсін­діріп қана қоймай, олардың ұсыныстары мен бастамаларын ортаға салуға мүмкіндік берді. Айта кетейік, Bir Tolqynda диалог алаңы аясындағы осындай кездесулер елі­міздің 20 өңірінде де ұйымдастырылды.