Sputnik.KZ парақшасынан алынған деректерге сүйене отырып, Qazaq24.com хабарлама жасады..
АСТАНА, 14 тамыз – Sputnik. Оқу-ағарту министрінің вице-министрі Шынар Ақпарова жаңа оқу жылында мектепте болатын өзгерістерді жариялады, деп хабарлайды Sputnik Қазақстан.
Бастауыш сыныптарда бөлім бойынша жиынтық бағалау (БЖБ) мен тоқсан бойынша жиынтық бағалау (ТЖБ) болмайды.
"Ендігі басымдық баланы жиі бағалауға емес, оның оқу материалын терең түсініп, алған білімін іс жүзінде қолдануына қажетті жағдай қалыптастыруға беріледі. Ал жоғары сыныптарда барлық негізгі пәндерді міндетті түрде оқыту заңнамалық тұрғыда бекітіледі. Осыған байланысты қысқартылған үлгілік оқу жоспарларынан бас тартылады", - деді Ақпарова тамыз конференциясында.
Бұдан бөлек, 5–9-сыныптарда іргелі пәндерді тереңдетіп оқытуға баса мән беріледі. Ал 8–9-сыныптарда "Қазақстан географиясы" пәнін аптасына екі сағат оқыту жоспарланған.
Жаңа оқу жылынан бастап 5–7-сыныптарда "Конституция негіздері", ал 8–11-сыныптарда "Заң және тәртіп" міндетті курстары енгізіледі. Экологиялық ағарту бойынша бірыңғай стандарт әзірленеді.
1 қыркүйектен бастап клубтар, үйірмелер мен әскери-патриоттық сыныптар "Жас айбын" бірыңғай мәртебесімен біріктіріледі. Жоба қатысушылары үшін келісімшарт бойынша әскери қызметке және әскери оқу орындарына түсу кезінде ынталандыру шаралары қарастырылған.