Qazaq24.com, Tengrinews.KZ дереккөзінен алынған мәліметтерге сүйене отырып мәлімдеме жасады..
Петропавлда теміржол вокзалы мен Жұмысшы кентін байланыстырып тұрған жаяу жүргіншілер көпірі жабылды. Жергілікті тұрғындар бұған наразы: ондаған жыл бойы бұл көпір олар үшін қалаға баратын ең қысқа, сенімді әрі тегін бағыт болып келген, деп хабарлайды Tengrinews.kz тілшісі.
Жұмысшы кенті Петропавлдың шетінде орналасқан. Оны қаланың қалған бөлігінен теміржол бөліп тұр, ол арқылы кеңес дәуірінде автокөлік көпірі салынған. Көлігі жоқ тұрғындар 1964 жылы тұрғызылған жаяу жүргіншілер көпірін ондаған жылдар бойы пайдаланып келді. Көпір тікелей вокзалға шығады, ал ол жерден қоғамдық көлікпен қаланың кез келген нүктесіне жетуге болатын еді.
Фото Tengrinews.kz
Алайда бірнеше күн бұрын көпір жабылып қалды.
"Теміржол вокзалы ауданындағы жаяу жүргіншілер көпірі апатты жағдайына байланысты жабылды. Көпірді алдағы уақытта жөндеу мәселелері белгіленген тәртіппен қаралады. Аталған нысан Оңтүстік Орал теміржолының (Ресей Федерациясы - ескертпе) теңгерімінде", - делінген Петропавл әкімдігінің ресми хабарламасында.
Фото Tengrinews.kz
Көпірдің жанындағы ақпараттық тақтайшаларда конструкцияның өте қауіпті апаттық күйде болуына және құлау қаупіне байланысты жабылатыны жазылған.
"Азаматтардың қауіпсіздігін сөзсіз қамтамасыз ету мақсатында арнайы өкім шыққанға дейін көпір арқылы өтуге екі жағынан да тыйым салынады. Қауіпсіздігіңізге қатер төніп тұр – құлау қаупі бар. Бағыттарыңызды алдын ала жоспарлап, балама жолдарды таңдауыңызды сұраймыз", - деп түсіндірді көлік полицейлері.
Фото Tengrinews.kz
Осындай қатаң ескертулерге қарамастан, көпір жабылғаннан кейінгі алғашқы күндері Жұмысшы кентінің тұрғындары оларды елемеген. Олар тыйым салу ленталарын жыртып тастап, көпірден өтуді жалғастырған. Содан кейін Петропавл станциясындағы желілік полиция бөлімінің қызметкерлері көпірдің барлық кіреберістерін дәнекерлеп, жолын толық бұғаттады.
Қала билігі Жұмысшы кентінің тұрғындарына балама ретінде вокзалдан көпірдің жанында орналасқан "Жібек жолы" базарына дейін және кері қарай автобус бағытын ұсынды. Алайда бұл шешім қала тұрғындарының одан сайын наразылығын тудырды.
Бұрын тұрғындар көпір арқылы вокзал алаңына бірнеше минутта тегін жететін. Енді олар жолға көбірек уақыт пен ақша жұмсауға мәжбүр: алдымен балама автобусқа ақы төлесе, кейін вокзалда қажетті бағытқа ауысып міну үшін тағы да билет сатып алады.
Фото Tengrinews.kz
Жағдайдың ушыққаны соншалық, Жұмысшы кентінің тұрғындары өз мұңдарын қала билігіне жеткізу үшін жабылған көпірдің алдына жиналуды ұйғарды.
"Бұл біздің өмір жолымыз""Мұнда тұрғаныма 42 жыл болды. Көпір кенттің қақ ортасында орналасқан, бәрі ол арқылы вокзалға барады, ал ол жерден қаланың кез келген ауданына жетуге болады. Ал Жұмысшы кентінің өзінен біз тек 7-ші және 16-шы бағыттағы автобустармен ғана шыға аламыз. Оның үстіне, қазір олар адамға лық толы. Ал вокзалға дейін барып, кейін өз бағытыңа ауысып міну – бұл екі есе төлем деген сөз. Барып-қайтуға кем дегенде 400 теңге кетеді. Ал отбасында бірнеше адам болса ше?! Бұл дегеніңіз жолдың өзіне біршама қаржы жұмсалады деген сөз", - дейді Жұмысшы кентінің тұрғыны Светлана Щерба.
Светлана Щерба. Фото Tengrinews.kz
Светлананың сөзін кенттің басқа тұрғындары да толық қолдап отыр.
Нина Кривошееваның айтуынша, оның үш немересі бар, олардың бәрі қаладағы мектептер мен колледждерде оқиды. Сонымен қатар Петропавлдың әр түрлі аудандарындағы үйірмелерге барады.
"Біздің балаларымыздың несі кем""Енді көлік шығынына күніне 2 мың теңгеден кетеді. Бұл бюджетке үлкен соққы! Бұдан әрі қалай болатынын білмеймін. Жұмысшы кентіндегі 31-мектеп – тоғыз жылдық, балалар бұл мектептен кейін әдетте вокзалдағы мектепте немесе теміржол колледжінде оқуын жалғастырады. Олар бұрын көпірмен өтіп-ақ оқуларына бара беретін, ал қазір автобусқа ақша төлеуі керек, оны күтіп тұру тағы бар, ал кестесі мүлдем ыңғайсыз", - деді әйел.
Жұмысшы кентінің тұрғындары балаларының онсыз да назардан тыс қалатынына наразы – кентте ешқандай үйірмелер мен секциялар жоқ, айналысатын ештеңе жоқ. Көптеген бала қалаға биге, музыкаға, бассейнге, спорттық секцияларға барады.
"Көршінің балаларынан қазір қалай қатынап жүргендерін сұраймын. Шығын болмасын деп, екі автобусқа мінбеуге тырысамыз, Жұмысшы кентінен жеткен жерімізге дейін барып, ары қарай жаяу барамыз дейді. Ал алдымыз қыс! Әрине, көбі үйірмелерін тастап кетеді. Неге біздің балаларымызды ешкім ойламайды?! Олардың несі кем?" - дейді Нина Кривошеева таңданып.
Екатерина Дивольд Жұмысшы кентінде көп жылдан бері тұрады. Үлкен қызы – колледж студенті, кішісі – қалалық мектептің бірінші сыныбында оқиды. Бұрын ол кіші қызын бірнеше минутта көпірден өткізіп, қажетті маршрутқа отырғызып, мектепке апаратын.
"Қазір баланы мектепке апарып, жұмысқа жету үшін отбасымыздан күніне кем дегенде мың теңге кетеді. Күн сайын таңғы 06:30-да адам толы "жетінші" автобуспен баламды басқа автобусқа ауыстырып мінгізу үшін колхоз базарына дейін барамын, содан кейін оны мектепке апарамын. Одан кейін өзім жұмысқа кетемін. Үлкен қызым да бірнеше автобуспен қатынайды", - дейді Екатерина.
Екатерина Дивольд. Фото Tengrinews.kz
Бәрі де зардап шегіп жатырҚалаға баратын жолдың ұзақ әрі қиындығына зейнеткерлер де шағымданып отыр: бұрын көпір арқылы қалалық екінші аурухананың филиалына тез жететін болса, енді бірнеше көлік ауыстырып жүруге мәжбүр. Тұрғындар балама автобус бүкіл Жұмысшы кентін аралап өтіп, содан кейін ғана вокзалға бағытталуы керек деп есептейді.
Фото Tengrinews.kz
Көпірдің жабылуы жергілікті кәсіпкерлерге де соққы болып тиді: маңайда үш ірі базар орналасқан, алайда жаяу жүргіншілер қозғалысы тоқтаған соң, мұндағы сауда мүлдем тұралап қалды.
"Көпір жабылғалы сауда жоқ. Біз мұнда көптеген жұмыс орнын аштық, барлық сатушының бала-шағасы, несиесі бар... Әрі қарай не істерімізді білмейміз", - дейді кәсіпкер Бақтияр Абдуллаев.
Бақтияр Абдуллаев. Фото Tengrinews.kz
Жұмысшы кентінің тұрғындары өздерін екінші сортты адамдардай, еленбеген әрі ешкімге керексіз жандай сезінетінін айтады.
"Осыншама үлкен кентті оқшаулап, "үлкен жерден" бөліп тастады. Енді жер аударылған Робинзондар сияқтымыз. Мұнда халық ағыны өте көп еді. Енді қалай болатынын білесіз бе? Адамдар теміржол бойымен жүре бастайды! Шынымен де біреудің құрбан болғанын қалай ма?" - деді Жұмысшы кентінің тұрғындары.
Тұрғындарды бәрінен де көпірдің апатты күйде екендігі ешқандай құжатпен немесе ешкім тарапынан расталмағаны ашуландырады.
Фото Tengrinews.kz
Азаматтардың қауіпсіздігі үшінПетропавл қаласының әкімдігі қалыптасқан жағдайға қатысты жауап беріп, жаяу жүргіншілер өткелі "РЖД" ААҚ меншігінде екенін атап өтті.
"Құрылыстың техникалық жай-күйін алдын ала бағалау барысында мамандар азаматтардың қауіпсіздігіне әлеуетті қатер төндіретін жағдайларды анықтады. Осыған байланысты жол өтпесін жаяу жүргіншілер үшін уақытша жабу туралы шешім қабылданды. Бұл шара ықтимал жазатайым оқиғалардың алдын алуға және тұрғындардың қауіпсіздігін қамтамасыз етуге бағытталған. Ресей тарапына жол өтпесіне жөндеу жүргізу мүмкіндігін қарастыру және жұмыстарды барынша қысқа мерзімде орындауды қамтамасыз ету туралы тиісті өтініш жіберілді", - деп сендірді Петропавл әкімдігіндегілер.
Сондай-ақ онда Жұмысшы кенті тұрғындарына ыңғайлы болу үшін "Теміржол вокзалы - Жұмысшы кенті" бағыты бойынша автобус маршруты ұйымдастырылғаны түсіндірілді.
"Автобустар таңғы сағат 07:00-ден бастап теміржол вокзалы мен "Жібек жолы" аялдамасынан аттанады. Бұған дейін маршрут жұмысы 20:00-де аяқталатын. Қазіргі уақытта оның жұмыс уақытын 22:00-ге дейін ұзарту жоспарланып отыр", - деп хабарлады қалалық әкімдік.
Петропавл әкімдігі тексеру аяқталып, алдағы техникалық шешімдер анықталғанға дейін азаматтардың қауіпсіздігін қамтамасыз ету мақсатында жол өтпесі жабық болатынын мәлімдеді.
Бізді Google-дың негізгі дереккөздер тізіміне қосыңыз
Қосу