Интернеттегі контенттің қанша пайызын жасанды интеллект жазады

Pewresearch.org зерттеуінің нәтижесіне сәйкес, 2026 жылғы шілдеде веб-парақшалардың шамамен 10 пайызынан жасанды интеллект арқылы жазылған немесе басым бөлігі соның көмегімен өңделген мәтіннің белгілері анықталған.

Зерттеушілер бұл көрсеткішті анықтау үшін Common Crawl веб-архивіндегі соңғы бес жылда жарияланған ағылшын тіліндегі 500 мыңға жуық веб-парақшаны талдаған. Олардың қатарында ChatGPT іске қосылғанға дейін жарияланған материалдар да бар.

Зерттеу барысында мәтіндер Open Pangram деп аталатын жасанды интеллектті анықтау құралы арқылы тексерілген. Машиналық оқыту моделіне негізделген жүйе мәтіндегі сөздер, тіркестер мен тілдік ерекшеліктерді талдап, олардың жасанды интеллектке тән үлгілерге қаншалықты ұқсас екенін анықтайды.

Зерттеушілер 2026 жылғы шілдеде кездейсоқ таңдалған 10 мың веб-парақшаны жеке қарастырған. Нәтижесінде олардың 10 пайызында жасанды интеллект авторлығының елеулі белгілері байқалған. Бұл көрсеткіш 2022 жылдың соңынан бері өсіп келеді. Сол жылы OpenAI компаниясы ChatGPT чат-ботын көпшілікке ұсынды. Кейін Claude, Gemini сияқты басқа да жасанды интеллект құралдары пайда болып, мәтін генерациялау мүмкіндіктері кеңейді. Дегенмен жалпы көрсеткішті түсіндіру кезінде интернетте бұрыннан жарияланған материалдардың көп екенін ескеру қажет. Яғни кездейсоқ таңдалған веб-парақшалардың бір бөлігі жасанды интеллект дәуіріне дейін жазылған.

Ал ChatGPT шыққаннан кейін жарияланған материалдарды ғана қарастырғанда, көрсеткіш әлдеқайда жоғары. Зерттеудің 2026 жылғы шілдедегі дерегіне сәйкес, осы кезеңнен кейін жарияланған веб-парақшалардың үштен бірінен астамынан жасанды интеллект авторлығына тән белгілер анықталған. Бұл нәтиже интернеттегі жаңа контенттің елеулі бөлігін жасанды интеллект жасап немесе өңдеп жатқанын көрсететін өзге зерттеулердің қорытындыларымен де сәйкес келеді.

Қай домендерде AI мәтіні көп? Жасанды интеллект арқылы жасалған немесе өңделген мәтін интернеттің барлық бөлігінде бірдей таралмаған.

ChatGPT алғаш іске қосылған кезде жасанды интеллект авторлығын білдіруі мүмкін тілдік ерекшеліктер .com, .org, .edu және .gov домендеріндегі парақшаларда шамалас деңгейде байқалған. Алайда 2026 жылғы үлгілерде айырмашылық айқынырақ байқалады.

Зерттеу бойынша, .com доменіндегі әрбір он парақшаның шамамен біреуінен жасанды интеллект авторлығының белгілері анықталған. Бұл .org домендеріндегі көрсеткіштен шамамен екі есе жоғары. .org сайттарында мұндай белгілер 4,6 пайыз парақшадан байқалған.

Ал .edu және .gov домендерінде бұл көрсеткіш шамамен 1 пайызды құраған. Осылайша, .com домендеріндегі AI белгілерінің жиілігі аталған екі доменмен салыстырғанда шамамен он есе жоғары болып отыр.

Зерттеушілердің айтуынша, бұл көрсеткіштер интернеттегі жасанды интеллектпен жасалған контенттің таралу деңгейін бағалауға мүмкіндік береді.