Қазақстан ең қуатты суперкомпьютері бар елдер картасына енді

Қазақстан әлемнің ең қуатты суперкомпьютері бар елдер картасына ресми түрде енді, деп хабарлады жасанды интеллект және цифрлық даму министрі Жаслан Мәдиев. 

"Жаңартылып жарияланған TOP-500 рейтингінде Қазақстан алғаш рет өз суперкомпьютері бар елдер қатарына кірді. AI және цифрлық даму министрлігінің басқаруындағы суперкомпьютер әлемдік ТОП-100-ге кіріп, 86-орын алды", – деп жазды министр. 

Ал "Қазақтелеком" АҚ суперкомпьютері 103-орында тұр. 

"Бұл есептеу қуаттары енді зерттеу орталықтарына, университеттерге, IT компаниялар мен стартаптарға, сондай-ақ мемлекеттік органдарға ашық әрі қолжетімді болады. Бұл – еліміздің цифрлық егемендігі мен AI-инфрақұрылымының дамуы үшін тарихи қадам", – деді Жаслан Мәдиев. 

Еске салайық, мемлекет басшысы Қасым-Жомарт Тоқаев биыл 9 шілдеде Alemcloud Ұлттық суперкомпьютер орталығында NVIDIA H200 графикалық процессорлары базасында жасақталған суперкомпьютерді іске қосқан болатын. 

Жаңа дата-орталықтағы жүйені Цифрлық даму, инновациялар және аэроғарыш өнеркәсібі министрлігі халықаралық серіктестермен бірге орнатып, пайдалануға берді. Жаңа суперкомпьютер кластері FP8 форматында есептеу әдістемесі бойынша 2 экзафлопсқа дейінгі өнімділікті қамтамасыз ете алады. Есептеу қуаты жағынан Орталық Азия өңіріндегі ең үздігі саналады.