"Барлық қарыз жабылады": "Даму" қоры кәсіпкерлерге субсидия төлеу мәселесіне нүкте қойды

"Даму" қоры кәсіпкерлерге берілетін барлық субсидияны толық көлемде төлейді. Бұл туралы қордың басқарма төрағасының орынбасары Талғат Смағұлов Орталық коммуникациялар қызметінде өткен брифингте мәлімдеді.

Спикердің айтуынша, Үкімет биылғы жылға жоспарланған қаржыны толығымен бөлген.

"Даму" қоры барлық бекітілген жобалардың төлемін жасап, бұрын төленбеген субсидиялар бойынша қарыздың бәрін өтеп жатыр. Біз алдағы күндері міндеттемелердің барлығын толық өтейміз. Қолданыстағы келісімдер де ары қарай кідіріссіз қаржыландырылады. Үкімет міндеттемелерінде көзделгендей, барлық кәсіпкер жыл соңына дейін субсидиясын алады", – деді Талғат Смағұлов. 

Басқарма төрағасының орынбасары қордың штаттық режимде жұмыс істеп тұрғанын және қаржылық қиындықтар жоқ екенін атап өтті.

Сонымен қатар Талғат Смағұлов жуырда микро және шағын бизнеске арналған жаңа портфельдік субсидиялау бағдарламасы іске қосылатынын хабарлады. Бағдарлама аясында кәсіпкерлер 200 миллион теңгеге дейін несие ала алады.

"Бағдарлама өңдеу өнеркәсібі, көлік, білім, медицина және қызмет көрсету салаларындағы шағын жобаларды қолдауға бағытталған. Ерекшелігі – банктер өтінімдерді "Даму" қорына жолдамайды. Олар тек субсидиялау графигін жүйеге енгізеді, ал қор 2 жұмыс күні ішінде барлық жұмысты орындайды. Бағдарламаның басталу уақыты мен толық шарттары жақын күндері жарияланады", – деді Талғат Смағұлов. 

Жыл басынан бері "Даму" қоры отандық кәсіпкерлерге 1 трлн 739 млрд теңге көлемінде қолдау көрсетіп, 9 мыңнан астам жобаны қаржыландырды. 

"Қордың базасында екі кепілдік қоры құрылған. Олардың міндеті – кәсіпкерлер үшін ең маңызды мәселе болып саналатын жеткіліксіз кепілзат проблемасын шешу. Егер кәсіпкерде толық кепіл болмаса, тәуекелдің белгілі бір бөлігін "Даму" қоры өз мойнына алатындықтан, бизнеске несие алу жеңілдейді", – деді спикер.

Нәтижесінде, кепілдендірілген несие портфелі өткен жылмен салыстырғанда 158%-ға өсіп, рекордтық көрсеткішке жеткен. Қазірдің өзінде жалпы сомасы 700 млрд теңгеден астам несие беріліп, оның 447 млрд теңгесіне қор кепіл болған. 

"Бірінші кепілдік қоры аясында 383 млрд теңге несие беріліп, 212 млрд теңге кепілдік ұсынылды. Оның резерві бюджетпен қатар, банктердің міндетті жарналары, қаржы институттарының ерікті жарналары, кәсіпкерлер комиссиялары және қордың меншікті қаражатынан қалыптасады. Кепілдіктер қазір портфельдік тәсілмен беріледі, яғни қор жобаны қайта сараптамайды. Банк оң шешім қабылдағаннан кейін "Даму" қоры кепілдікті 2 жұмыс күні ішінде рәсімдейді", – деді Талғат Смағұлов.

Сонымен қатар, спикер "Өрлеу" бағдарламасы іске қосылғанын да атап өтті. Бұл бағдарлама субсидияға тәуелді емес. Кәсіпкерлер 12,6% мөлшерлемемен 10 жылға дейін несие алып, айналым қаражатын 3 жылға дейін қаржыландыра алады. Қазірдің өзінде бағдарлама аясында 1,6 мыңнан астам кәсіпкерге 475 млрд теңге көлемінде несие берілген.