Қырғызстанда студенттер диплом жұмысының орнына тағылымдамадан өтуі мүмкін

Қырғызстанның Ғылым, жоғары білім және инновациялар министрлігі студенттердің қорытынды аттестациясына қатысты жаңа өзгерістерді қоғамдық талқылауға шығарды. Тиісті қаулы жобасы үкіметтің қарауына ұсынылды, деп жазды 24.kg.

Жобаға сәйкес, бітіруші курс студенттері үшін дипломдық жұмысты міндетті 16 апталық өндірістік практикамен (тағылымдамамен) алмастыру көзделген. Сонымен қатар, тәжірибе нәтижелері қорытынды аттестацияның бір бөлігі ретінде есепке алынады.

Министрліктің мәліметінше, дипломдық жұмысты алмастыру мәселесі жоғары және орта кәсіби білім беру ұйымдарының оқу-әдістемелік бірлестіктерімен бірлесіп талқыланған. Ведомство бұл бастама мамандарды даярлау сапасын арттырып, түлектердің еңбек нарығына дайын болуын күшейтеді деп есептейді. Жаңа ережелерге сәйкес, студенттер тағылымдама барысында қорытынды есеп тапсырады. Ол бизнес-жоспар, стартап-жоба, қолданбалы жоба немесе коммерциялық әлеуеті бар өзге де практикалық нәтиже түрінде болуы мүмкін. Бұл формат дипломдық жұмысқа балама ретінде мемлекеттік қорытынды емтихандар тізіміне енгізілмек.

Құжатта тағы бір маңызды норма қарастырылған. Оған сәйкес, егер қорытынды мемлекеттік аттестацияны өткізу немесе диплом беру тәртібі бұзылғаны анықталса, мемлекеттік аттестациялық комиссияның түлекке біліктілік беру және диплом тапсыру туралы шешімі жойылуы мүмкін.

Министрлік бұл өзгерістерді енгізу қажеттігін тексерулер нәтижесімен түсіндірді. Қырғызстанның Ұлттық қауіпсіздік мемлекеттік комитеті бірқатар оқу орындарында қорытынды аттестация мен диплом беру барысында заңбұзушылықтар анықтаған. Қазіргі таңда жоғары және орта арнаулы оқу орындарында бұрын берілген дипломдарды кері қайтарып алу құзыреті жоқ.

Жоба қоғамдық талқылаудан кейін қабылданса, Қырғызстандағы жоғары білім беру жүйесінде айтарлықтай өзгерістер болуы мүмкін.