Air Astana ұшағы ақауға байланысты Делиде мәжбүрлі түрде қонды

Air Astana ұшағы техникалық ақауға байланысты Делиде мәжбүрлі түрде қонды, деп хабарлайды Arasha.kz.

«18 желтоқсанда Алматы – Бангкок бағыты бойынша KC931 рейсін орындаған ұшақ техникалық себеппен Делидегі әуежайға қонды. 138 жолаушымен ұшақ Алматыдан сағат 1.00-де ұшып шықты және сағат 5.51-де Делиге штаттық режимде қонды. Барлық жолаушыларға тамақ ұйымдастырылды, уақытша визалар берілді, авиакомпания жолаушыларды қонақ үйде орналастыру мәселесін шешіп жатыр. Сонымен қатар Бангкокқа рейсті жалғастыру үшін резервтік ұшақ дайындалуда», — деп хабарлады авиакомпания бейсенбі күні.

Бұған дейін ұшақтың мәжбүрлі қонуы туралы журналист Михаил Козачков хабарлаған.

«Түнде Алматыдан Бангкокқа ұшқан Air Astana ұшағы Делиде мәжбүрлі қонды — жолаушылар сол жақ қозғалтқыш тұсынан қатты жарылысты естігенін айтады», — деп жазды Козачков өз Telegram-каналында.

Ол бұл ұлттық әуе компаниясының ұшағымен орын алған екінші оқиға екенін атап өтті.

«Тек кеше, 17 желтоқсанда, Алматы – Астана рейсі кезінде Airbus A321 салонында түтін шықты. Экипаж MAYDAY сигналын беріп, ұшу орнына оралды. Ал бүгін түнде Алматы – Бангкок рейсі KC931 кезінде оқиға орын алды. @Koza4kov_BOT жазғандай, Air Astana жолаушылары ұшу кезінде сол жақ қозғалтқыш ауданында қатты жарылысты естігенін айтты, содан кейін ұшақ кенет төмендей бастады, салонда күйген иіс пайда болды. Соңында экипаж ұшақты Делидегі әуежайға қондырды. Адамдарды ұшақта екі сағаттан астам ұстады, сосын ұшақ ақаулы екені хабарланды және әрі қарай ұшпайды. Қазір жолаушылар әуежай терминалында орналасқан», — деп толықтырды Козачков.