Джонни Депп өзінің аңызға айналған рөліне оралуы мүмкін. Актер маңызды сұраққа жауап берді

Танымал актер Джонни Депп "Кариб теңізінің қарақшылары" фильмінің алтыншы бөлімінде капитан Джек Торғайдың рөлін қайта сомдауға дайын екенін айтты, деп хабарлайды Tengri Life.

Актердің шарты

Entertainment Tonight басылымына берген сұхбатында актер "Қарақшылар" хикаясына әдемі нүкте қойғысы келетінін айтты. Сондай-ақ, өзі сенім артатын продюсер Джерри Брукхаймермен қайта жұмыс істеуге қарсы емес екенін жеткізді.

"Кариб теңізінің қарақшылары" фильмдер сериясын аяқтау жоспары көңілімнен шықса, оған қатысуға дайынмын. Мен үшін ең маңыздысы - бұл оқиға жоғары деңгейде аяқталуына үлес қосу", - деді актер.

Instagram-дағы бұл жазбаны көру

A post shared by Entertainment Tonight (@entertainmenttonight)

Еске салайық, бұған дейін "Кариб теңізінің қарақшылары" фильмдерінің продюсері Джерри Брукхаймер Deadline басылымына Джонни Депп фильмге қайта оралуы жөнінде келіссөз жүргізіп жатқанын айтқан еді. Оның сөзінше, шығармашылық топ сценариймен жұмыс істеп жатыр.

Дегенмен Джонни Депп фильмнің алтыншы бөліміне түсетіні әзірге ресми түрде расталған жоқ. БАҚ мәліметінше, сценарий әлі әзірленіп жатыр. Актерге Джек Торғайдың рөлін екінші пландағы кейіпкер ретінде сомдау ұсынылуы мүмкін.

Америкалық актер, продюсер әрі музыкант 1963 жылы 9 маусымда АҚШ-тың Кентукки штатындағы Оуэнсборо қаласында дүниеге келген. Ол "Қайшықол Эдвард", "Ұйқылы алқап", "Чарли және шоколад фабрикасы" фильмдері мен капитан Джек Торғайдың рөлін сомдаған "Кариб теңізінің қарақшылары" франшизасы арқылы әлемге танылды. Хикаяның алғашқы бөлімі 2003 жылы жарық көрді.

Актер бірнеше рет "Оскар" сыйлығына ұсынылып, "Алтын глобус" жүлдесін жеңіп алған.

Бізді Google-дың негізгі дереккөздер тізіміне қосыңыз