Еуразиялық экономикалық одақтың нарықтарды қорғау тәжірибесі таныстырылды

АСТАНА, 3 қараша – Sputnik. Женевада өткен Дүниежүзілік сауда ұйымының (ДСҰ) "ережелер апталығында" Еуразиялық экономикалық одақтың нарықтарды қорғау тәжірибесі таныстырылды. Бұл туралы Еуразиялық экономикалық комиссия хабарлады.

ЕАЭО-ның демпингке қарсы тергеп-тексеру жұмыстарын ДСҰ-ның бейінді органдарының бірқатар отырысында ЕЭК Ішкі нарықты қорғау департаментінің директоры Андрей Захаров таныстырды.

"Дүниежүзілік сауда ұйымының іс-шараларына қатысу ДСҰ-ға мүше, осы мәселеге мүдделі мемлекеттермен сындарлы диалог орнатуға, ЕАЭО-ның халықаралық аренадағы беделін нығайтуға, сондай-ақ одақтың ішкі нарықты қорғау шараларын қолдану тәртібі мен тергеп-тексеру барысында өз мүдделерін қорғау мүмкіндіктері туралы ақпараттың қолжетімділігін арттыруға мүмкіндік береді", – деді ол.

Кездесулер барысында қатысушылар мына мәселелерді талқылады:

тергеп-тексеру барысында жасанды интеллектіні пайдалану мүмкіндіктері мен перспективалары;

цифрландыру жағдайында құпия ақпаратты қорғау;

кадрларды даярлау және кадрлық құрамды сақтау мәселелері;

тергеп-тексерудің тиімділігі мен жеделдігін арттыру жолдары;

шешім қабылдау кезінде қоғамдық мүдделерді ескеру.

Андрей Захаров бірқатар жұмыс кездесуін өткізді. Олардың қатарында Еуразиялық экономикалық одаққа мүше әрі ДСҰ құрамына кіретін мемлекеттердің өкілдерімен, сондай-ақ ДСҰ хатшылығының Ережелер жөніндегі бөлімшесінің басшылығы және қызметкерлерімен кездесулер болды.