Павлодарлық мектеп оқушысының ағасы ChatGPT ге айтқан сырынан кейін 20 жылға сотталды

Павлодарда ChatGPT 12 жастағы мектеп оқушысына алты жасында көрген зорлық-зомбылығы туралы айтуға көмектесті. Басынан өткен жағдайды құпия сақтап келген қызға жасанды интеллект психологқа жүгінуге кеңес беріп, шұғыл қызметтердің нөмірлерін ұсынған. Нәтижесінде іс сотқа дейін жетіп, оқушы қыздың 39 жастағы ағасы 20 жылға бас бостандығынан айырылды, деп хабарлайды Tengrinews.kz тілшісі.

Үкім 3 қарашада Павлодар облысының қылмыстық істер жөніндегі мамандандырылған ауданаралық сотында жарияланды. Ер адам жас балаға қатысты сексуалдық сипаттағы өзге де іс-әрекеттер жасағаны үшін кінәлі деп танылды.
Фото сот залынан: Tengrinews.kz
Сотта қылмыс 2020 жылдың наурызында сотталушының қарындасының пәтерінде болған, ол кезде оның жиені алты жаста еді. Сол жылы ер адам Алматы облысына көшіп кеткен, ал бала жас болғандықтан әрі қорыққандықтан, болған жағдайды ұзақ жылдар бойы жасырып келген.
Өткен жылдың қараша айында ағасы телефон соғып, хабарлама жаза бастағанда, қыздың ауыр естеліктері қайта жаңғырған.

"Ағам үнемі хабарласып, балаларымның жағдайын сұрап тұратын. Мен олардың қалай оқитынын, немен айналысатынын айтатынмын. Қызымның гитара үйреніп жүргенін де жеткіздім. Өткен жылы күзде ол қызымның нөмірін сұрады, мен ештеңе сезбестен бере салдым. Кейін ол қызыма қайта-қайта жазып, неге жауап бермейтінін, неге елемейтінін сұрап, тіпті гитара сатып әперуге уәде бергенін білдім", - деді зардап шеккен қыздың анасы Tengrinews.kz тілшісіне.

Сотталушы қыздың анасының бір әке, бір шешеден тумаған ағасы болып шықты.
Павлодарлық әйелдің айтуынша, қызы туысының қоңыраулары мен хабарламаларына жауап бермеген. Кейінірек әйел қызының оның қайтып келуінен қорыққанын білген.

"Қызым ChatGPT-ге басынан өткен жағдайды, өзіне қол жұмсау туралы ойлар келетінін және бұлай өмір сүргісі келмейтінін жазған. Чат-бот оған психологқа жүгінуге кеңес беріп, шұғыл қызметтердің тізімін ұсынған. Алдымен қызым 111 қызметіне қоңырау шалған, ол жерде оны психологпен байланыстырған. Қызым ағамның оған не істегенін сол маманға айтып берген. Содан кейін психолог маған хабарласты", - деді оқушының анасы.

Қыздың соттағы айғақтарын қоңырауды қабылдаған байланыс орталығының маманы мен оқушының осы жағдай туралы айтып берген құрбысы растады. Анасы болған жағдайға сенудің қиын болғанын мойындады.

Үкім жарияланғаннан кейін іс бойынша төрағалық етуші судья Нұрлан Айтбаев сотталушының өз кінәсін мойындамағанын хабарлады. Алайда сотқа дейінгі тергеу кезеңінде қорғалуға құқығы бар куәгер мәртебесінде болғанда, ер адам бәрін мойындаған.

"Сондай-ақ айыптау актісіне сәйкес, сотталушыға 2019 жылғы 17 желтоқсандағы және 2020 жылғы 18 қаңтардағы тағы екі эпизод тағылған болатын. Бірақ олар Сотқа дейінгі тергеп-тексерулердің бірыңғай тізіліміне тіркелмегендіктен, сот оларды тағылған айып көлемінен алып тастады", - деді судья Айтбаев.

Сот талқылауы барысында ер адам қамауда болған кезде өзіне қатысты рұқсат етілмеген әдістер қолданылғанын да мәлімдеді. Бірақ бұл уәждер расталмады.

Сот жазаны жеңілдететін мән-жайлар ретінде ер адамның бұрын сотты болмағанын және тұрғылықты жерінен оң мінездеме берілгенін ескерді. Ауырлататын мән-жайлар анықталған жоқ.

"Сотталушы 121-баптың 4-бөлігінде көзделген қылмысты 2020 жылғы 20 наурызда, яғни осы іс-әрекеттер үшін қатаңдығы төменірек жаза тағайындайтын 2019 жылғы 27 желтоқсандағы редакциядағы Қылмыстық кодекс қолданыста болған кезде жасаған. Сот осы бап бойынша 20 жылға бас бостандығынан айыру жазасын тағайындауды дұрыс деп тапты", - деп түсіндірді судья Айтбаев.

Сотталған адам жазасын қылмыстық-атқару жүйесінің орташа қауіпсіздік мекемесінде өтейді. Үкім заңды күшіне енген жоқ..

Қазақстандық екі балаға АИТВ жұқтыру ісі бойынша өмір бойына бас бостандығынан айырылды

Еске сала кетейік, 20 қазанда Павлодарда 48 жастағы ер адам екі кішкентай қызға қатысты қылмыс жасау ісі бойынша өмір бойына бас бостандығынан айырылған болатын. Сотталған адамның іс-әрекеті салдарынан олар АИТВ-инфекциясын жұқтырған. Ер адам екі кішкентай апалы-сіңліліге қатысты аса ауыр қылмыс жасады деп айыпталды. Сот процесі жабық режимде өтті, бірақ үкім жария түрде оқылды. Толығырақ осы жерден оқи аласыз.

Бізді Google-дың негізгі дереккөздер тізіміне қосыңыз