Қаскелеңде мектеп оқушысының өліміне миға қан құйылу себеп болуы мүмкін

Қаскелең қаласында 15 жастағы жасөспірім мектепте сабақ кезінде кенеттен өзін жайсыз сезініп, кейіннен көз жұмды, – деп хабарлайды Aikyn.kz сайты КТК телеарнасына сілтеме жасап.

Қайғылы жағдайға байланысты оқушының өлімінің алдын ала себебін мектеп директоры Рысбүбі Дүйсебаева мәлімдеді. 

Мектеп басшысының айтуынша, 9 «Г» сыныпта оқитын жасөспірім бірінші сабақтан кейін басы айналып, жүрегі айнығанын айтып шағымданған. Педагогтар дереу жедел жәрдем шақырған. Алайда дәрігерлердің барлық әрекетіне қарамастан, оқушының өмірін сақтап қалу мүмкін болмаған.

Алдын ала мәліметке сәйкес, жасөспірімнің өліміне миға қан құйылу себеп болған.

«Балалар оның басы айналып, жүрегі айнығанын айтты. Жедел жәрдем бірден шақырылды. Сот-медициналық сараптама қорытындысына сәйкес, жасөспірімде мидың ісінуі анықталған. Нақтырақ айтқанда, миына қан құйылған», – деді мектеп директоры Рысбүбі Дүйсебаева.

Сондай-ақ мектеп басшысы марқұм оқушының сабақты жақсы оқығанын, спортпен белсенді айналысқанын, тәрбиелі әрі зерек болғанын, ешқандай жанжалға қатыспағанын атап өтті.