Әлемдік мұнай қоры 200 млн баррельге қысқарды

Әлемдік мұнай қоры соңғы айларда күрт азайып, тек сәуір айының өзінде шамамен 200 млн баррельге қысқарды. Бұл туралы Financial Times хабарлады.

S&P Global және Goldman Sachs сарапшыларының мәліметінше, қорлардың азаю қарқыны бұрын-соңды болмаған деңгейге жеткен. Сәуір айында мұнай қоры тәулігіне орта есеппен 6,6 млн баррельге төмендеген.

Сонымен қатар жаһандық сұраныс та әлсіреген: тәуліктік тұтыну шамамен 5 млн баррельге азайған. Бұл COVID-19 пандемиясынан кейінгі ең ірі құлдыраулардың бірі саналады.

Сарапшылардың айтуынша, әлемдік мұнай қорлары соңғы сегіз жылдағы ең төменгі деңгейге жақындап қалған. Мәселен, Солтүстік Еуропада авиаотын қоры алты жылдық минимумға түссе, АҚШ-та бензин қоры жазғы маусым қарсаңында тарихи ең төмен деңгейге жетуі мүмкін.

Мұндай жағдайға Таяу Шығыстағы геосаяси шиеленіс әсер етіп отыр. Аймақтағы қақтығыстар мен Ормуз бұғазы арқылы жеткізілімнің шектелуі салдарынан әлемдік нарыққа шамамен 1 млрд баррель мұнай жетіспей отыр.

Сарапшылар нарықтағы жағдайды алаңдатарлық деп бағалайды. Олардың пікірінше, мұнай қорының күрт азаюы алдағы уақытта бағаның одан әрі өсуіне алып келуі мүмкін.