Әлемдік сарапшы қазақстандықтарды мерекемен құттықтады

Лондонда өткен «Тұрақты болашақ» форумы аясында киберқауіпсіздік пен цифрлық трансформация саласының әлемдік сарапшысы Эрик Лэйкин Қазақстанның технология, цифрландыру және тұрақты даму саласындағы жетістіктерін ерекше атап өтті. Оның айтуынша, еліміз инновациялар мен халықаралық ынтымақтастықты үйлестіре отырып, болашаққа батыл қадам басып келеді. 

Сарапшы Қазақстанда бес рет болғанын ерекше атап өтті. Эриктің пікірінше, қазақ халқы жолаушыға қайырымды, қонақжай әрі өмірге құштар. Республика күні қарсаңында Лэйкин Қазақстан жұртына лебізін жолдады.

Эрик Лэйкин, ІТ компанияның бас директоры:

- Мен Қазақстанды және Республика халқын ұлттық мерекемен құттықтағым келеді. Бұл — ерекше күн және сіздер мақтан тұтуға әбден лайық елде тұрып жатсыздар. Америкалық азамат ретінде мен бұл сезімді жақсы түсінемін. 4 шілдеде біздің де кеудемізді мақтаныш сезімі кернейді. Қазақстан — жас мемлекет, бірақ қысқа уақыт ішінде зор жетістіктерге жетіп, нық сеніммен алға басып келеді. Мен мұны әр сапарымда байқаймын және сіздер жаққа жиі барғым келіп тұрады.