Әлі күнге дейін кешіре алмаймын : Медеу Арынбаев қызы туралы айтып, жұртты жылатты

Белгілі әнші Медеу Арынбаев өмірінде өшпес із қалдырған өкінішімен бөлісті. Ол бұл туралы «Хабар» арнасына берген сұхбатында айтып, көпшіліктің жүрегін толқытты, деп хабарлайды Arasha.kz.

Әншінің сөзінше, марқұм жары Айгүл Арынбаева екінші сәбиіне жүкті болған кезде, ол баланың ұл болатынына кәміл сеніп, соған қуанып жүрген. Алайда өмір басқа бағытта өрбіген.

«Келіншегім екінші баламызға жүкті болды. Жастықтың әсері шығар, “бұл жолы ұл болады” деп сеніп жүрдім. Босанатын уақыты келгенде перзентханаға апарып, орналастырдым да, үйге қайттым. Бір-екі күнде босанады деп, достармен бірге қуанышқа жиналдық. Тіпті тостымызды дүниеге келетін ұлға арнадық. Бір кезде телефон соғып, “құттықтаймыз, қызыңыз өмірге келді” дегенде, не айтарымды білмей қалдым. Достарыма “жігіттер, ұл емес, қыз екен” деген сөзімді өзіме әлі күнге дейін кешіре алмаймын. Қызымды әр сүйген сайын сол сәтті еске алып, іштей кешірім сұраймын», – деді Медеу Арынбаев.

Әнші бұл оқиғаны өмірінің ең ауыр әрі ең үлкен сабағы деп бағалайды.

Айта кетейік, Медеу Арынбаев марқұм жары, әнші Айгүл Арынбаевамен (Үмбетәлиева) 1996 жылы “АБК” тобының алғашқы концерттерінің бірінде танысып, екі айдан кейін шаңырақ көтерген. Бір жылдан соң ұлы Дәулет, ал екі жылдан кейін қызы Дайана дүниеге келген.