Ақмола облысындағы мектептерде үйірмелер көбейіп келеді

Ақмола облысындағы мектептерде 6 мыңнан астам қосымша білім беру үйірмесі жұмыс істейді.

Оның ішінде шығармашылық және спорт бағытынан бөлек, инженерия, компьютерлік графика, бағдарлау секілді үйірмелер де бар. Ал биылдан бастап ақмолалық оқушылар ұшақ үлгілерінің 3D моделін жасауды да қолға алған.

Көкшетаудағы техникалық мектеп-лицейіндегі авиүлгілеу үйірмесіне сұраныс жоғары. Қазір мұнда 20-ға жуық бала тәлім алады. Олар екі айдың ішінде 10-ға жуық ұшақ үлгісін жинақтаған.

Эдуард Червинский, оқушы:

- Мен кішкентай кезімнен бағдарламалау жүйесіне жақын болғандықтан, бұл үйірме мені қатты қызықтырды. Біз мұнда 3D модельдеу арқылы түрлі ұшақтарды жинаймыз. Оларды ұшырып көреміз. Болашақта мамандығымды осы саламен байланыстырғым келеді.

Қазір білім ошағында 23 үйірме жұмыс істейді. Оған 700-ге жуық бала қатысады. Әсіресе ұлттық өнерді жаңғыртуға мән берілген. Оқушылар спорт, музыка мен қолөнердің түр-түрін меңгереді. Ал робототехника үйірмесінде балғындар жасанды интеллектіні қолданып жүр.

Тамерлан Оралбек, оқушы:

- Ең бірінші біз жасанды интеллект арқылы идеяны табамыз. Идея тапқасын біз өз қолымызбен роботтарды құрастырамыз. Роботты құрастырғаннан кейін біз арнайы код жазамыз. Онда да  жасанды интеллектінің көмегіне жүгінеміз. Ол арқылы өз уақытымызды қысқарта аламыз.

Тілеген Амангелді, мектеп директоры:

- Тек қана білім, оқу дей бермей, олар өздерінің сүйікті ісі, хоббиімен айналысу керек. Сондықтан біздің мектептің қабырғасында қосымша білім беретін үйірмелер өте көп. Балалар онда демалады ғой. Онда жұмыс істемейді, онда өзінің қызыққан жақсы көрген үйірмесіне келіп, шаршауын басып кетеді деуге болады.

Бұдан бөлек, облыста қосымша білім беретін 47 ұйымы бар. Нәтижесінде өңірде 21 мың балаға бос уақытында шығармашылықпен айналысуға мүмкіндік жасалған.

Авторлары: Абзал Азаматұлы, Виктор Полянный