Әскери қызметшілерге төлем жасау тәртібі жаңартылды

Қазақстан Қорғаныс министрлігі Қарулы күштердің әскери қызметшілеріне ақшалай үлес, жәрдемақы және өзге де төлемдерді төлеу қағидаларына өзгерістер енгізді. Бұйрық 21 сәуірден бастап күшіне енді.

Негізгі түзетулер:

Ақшалай үлесті есептеу кезінде «істер мен лауазымды қабылдау күні» және «тапсыру күні» ұғымдары енгізілді. Теріс себеппен босатылған жағдайда сауықтыру жәрдемақысы айдағы нақты күнтізбелік күндерге пропорционалды есептеледі. Сыйақы беру тәртібі нақтыланды: ерекше тапсырмалар, жоғары нәтижелер, мемлекеттік және кәсіби мерекелер, сондай-ақ 40 жастан бастап әрбір бес жылдық мерейтойға орай.

Әлеуметтік қолдау:

Материалдық көмектің көлемі артты, енді ол ең төменгі жалақыға еселенген түрде белгіленеді (2026 жылы — 85 000 теңге). Жақын туыстары қайтыс болған жағдайда — 5 ЕТЖ-ға дейін (425 мың теңге). Некеге тұру, бала туу, бала асырап алу, емделу немесе мүліктік залал кезінде — 3 ЕТЖ-ға дейін (255 мың теңге).

Қорғаныс министрлігінің мәліметінше, бұл өзгерістер төлемдер жүйесінің ашықтығы мен әділдігін арттыруға, әскери қызметшілердің әлеуметтік қорғалуын күшейтуге бағытталған.

Бүгін, 13:12