Бублик Вена турнирінің ширек финалында әлемнің 1 ракеткасымен кездесуі мүмкін

Жарыстың 8-ракеткасы болып тіркелген қазақстандық теннисші екінші айналымда дүниежүзілік рейтингіде 21-орында тұрған аргентиналық Франсиско Серундоломен шеберлік байқасты.

Бірінші партияда Бублик 6:4 есебімен басымдылық танытты. Ол екінші сетте қарқынын үдетті – 6:2.

Бір сағат 6 минутқа созылған бәсекеде А.Бублик 11 эйспен бірге 4 брейк-пойнттың үшеуін құр жіберген жоқ. Серундоло 4 эйс жасағанымен, 6 брейк-пойнтты пайдалана алмады. 

Александр Бублик жартылай финалға шығу үшін италиялықтар, әлемнің 1-ракеткасы Янник Синнер немесе рейтингіде 22-сатыдағы Флавио Коболлидің қай жеңгенімен таласады. 

А.Бублик қазіргі кезде ATP Live рейтингісінде 15-орынға көтеріліп тұр. Бұл оның жеке рекордтық көрсеткіші болмақ.

Тағы бір қазақстандық, әлемнің 76-ракеткасы Юлия Путинцева Гуанчжоу (Қытай) WTA 250 турнирінің екінші айналымында рейтингіде 96-орындағы германиялық Элла Зайдельден жеңіліс тапты – 3:6, 2:6. Сөйтіп ол ширек финалдан тыс қалды.

Еске сала кетейік, бұдан бұрын Елена Рыбакинаның Токио турнирінің ширек финалына жолдама алғанын жазған едік. 

Сондай-ақ Бубликтің Алматыда ойнамай, артынша басқа турнирге қатысқаны жөнінде федерация жауап берді.