ChatGPT мен AliExpress компаниялары Қазақстан бюджетіне салық төледі

Фото: ЖИ/иллюстрация

Оның айтуынша, 2022 жылдан бері ел азаматтарына электрондық қызмет көрсететін немесе интернет арқылы тауар сататын шетелдік компаниялар «Google салығын» төлейді.

2025 жылдың қорытындысы бойынша Мемлекеттік кірістер комитеті 77 шетелдік интернет-платформаның салық міндеттемелерін толық орындамағанын анықтаған. Осыған байланысты оларға анықталған сәйкессіздіктер туралы хабарламалар жолданған.

«2025 жылдың қорытындысы бойынша ChatGPT 1,8 миллиард теңге көлемінде салықты қосымша төледі. Сондай-ақ AliExpress компаниясынан камералдық бақылау нәтижесінде Қазақстан бюджетіне 600 миллион теңгеден астам қаражат түсті. Бұған әртүрлі себеп болады. Кейбір компаниялар еліміздегі заң талаптарын білмейді. Біз оларға міндетті тіркеу туралы хабарлама жолдап, мұндай заңның бар екенін және оны сақтау қажет екенін түсіндіреміз. Кей жағдайларда компаниялар Қазақстаннан түскен төлемдерді дұрыс анықтамай жатады. Біз оларға қаражаттың қай банктер арқылы түскенін көрсетіп, түсіндіру жұмыстарын жүргіземіз», деді Талғат Әділов.

Мемлекеттік кірістер комитетінің мәліметінше, 2022 жылдан бері «Google салығы» бойынша бюджетке жалпы 171 миллиард теңге түскен. Оның ішінде 2026 жылдың басынан бері 40 миллиард теңгеден астам қаражат жиналған. Жыл соңына дейін бұл көрсеткішті 90-100 миллиард теңгеге жеткізу жоспарланып отыр.

IT саласына арналған салық жеңілдіктері 2045 жылға дейін ұзартылуы мүмкін

Қазіргі уақытта Қазақстанда 131 шетелдік интернет-компания шартты тіркеуде тұр. Биыл олардың қатарына тағы 13 компания қосылған.

Ірі салық төлеушілер қатарында Apple, Google және Valve компаниялары бар. Apple 2022 жылдан бері Қазақстан бюджетіне 24 миллиард теңге салық аударған.

Еске сала кетейік, бұған дейін Премьер-министр Олжас Бектенов NVIDIA мен Firebird секілді IT алпауыттарымен 10 миллиард долларлық келісімге қол қойылғанын мәлімдеген болатын.