Елді мекендерді газға қосу қарқынмен жүріп жатыр

Қазір ел халқының 62 пайызы көгілдір отынның қызығын көріп отыр. Былтыр 4 мың шақырым газ құбыры тартылды. Ал биыл 77 жобаны жүзеге асыру көзделген. Соның арқасында жыл соңына дейін тағы 300 мың адам газ желісіне қосылады. Осыған сай өңірлерде көмірге сұраныс біртіндеп азайып келеді. Мәселен, кейінгі жеті жылда Астанаға қыстан шығу үшін қажет көмір қоры 200 мың тонна кеміді.

Нұрқанат Қанапия, тілші 

- Газдандыру қарқыны артқанымен көмірге де сұраныс жоғары. Елдегі өндіріс ошақтары мен өңдеуші кәсіпорындардың дені әлі де осы көмірге тәуелді. Оның үстіне шығыс пен солтүстікте газ жетпеген ауылдар бар. Биыл жылу беру маусымына 7 млн тоннадан аса көмір қажет. Энергетика министрлігінің ақпаратына сүйенсек, отын қорының 65 пайызы дайын. Яғни өңірлерде көмір жеткілікті.

Мәселен, Астанада 14 нүктеде сатылып жатыр. (ГРАФИКА) Мұндағы баға маркасына қарай әртүрлі. Қала әкімдігінің мәліметі бойынша Шұбаркөл көмірінің тоннасы орта есеппен 18 400 теңгеге бағаланып отыр. Сондай-ақ Қаражыра көмірі – 17 800 теңгеге, Майкөбе көмірі 16 200 теңгеге сатылып жатыр. Әкімдік өкілінің айтуынша, Шұбаркөл көміріне сұраныс көп.  

Абылайхан Оспанов Астана қаласы энергетика басқармасы газдандыру бөлімінің бас маманы:

- Ең көп халық алатын көмір, сұраныс көп көмірдің маркасы. ол шұбаркөл болып табылады, Қарағандының шұбаркөлі. Бір тоннасы 18 400 теңгені құрайды. Оның жануы өте жақсы және басқа көмірге қарағанда “зола” дейді ғой, қалдықтары өте аз болып келеді. 

Елордада көмірге сұраныс кеміді. Дегенмен газдандыру арқасында Астанада көмірге сұраныс азайып келеді. Егер 2018 жылы елорданың отын қоры 500 мың тонна болса, арада жеті жыл өткенде 200 мың тонна кеміді. Яғни биыл қыстан шығу үшін 300 мың тонна көмір қажет. Қазір қалада 200 мың тоннаға жуық отын бар. Таяу жылдары қажеттілік тағы кемиді дейді әкімдік өкілі. 

Абылайхан Оспанов Астана қаласы энергетика басқармасы газдандыру бөлімінің бас маманы:

- Бүгінгі таңда 14 мың үй газға қолжетімді. Оның 12 500-і газға қосылды. Осы жылы біз Шұбар, Тельмана және Кирпичный тұрғын алаптарын газдандырамыз. Ол жақта да көмірге сұраныс азайтылады және де Ақмола облысының Астанаға жақын Қосшы, Жібек жолы және Талапкер ауылдар да осы жылы газға қосылды.

Иә, газ тарту басталған 2021 жылдан бері қаланы тұмшалаған көк түтін де сейілгендей. Қазір әкімдік көмір саудасын бақылауда ұстап отыр және көмір бағасы мен сату нүктелерін әкімдік сайтынан көруге болады. 

Авторлары: Нұрқанат Қанапия, Мерей Талап, Бағдат Қайыркен