Facebook жазбаларында заңдардың орындалуын жасанды интеллект тексереді

Aikyn.kz кең көлемді қайта құрылымдау Meta-ға неліктен керек болғанын CNBC-дің материалына сүйеніп талдайды.

Компаниядағы қысқартулар Meta-дағы кең көлемді қайта құрылымдаумен тұспа-тұс келіп отыр. Сәрсенбі күні (22 қазан) компанияның жасанды интеллект бөлімшесі – Superintelligence Labs-та жұмыс істейтін 600 қызметкер жұмыстан шығарылды.

Meta өкілі бұл шешімді былай түсіндіреді: «Біз өз бағдарламамыздың жетілу деңгейін көрсетіп әрі инновацияларды жылдам енгізу үшін ұйымдық өзгерістерді тұрақты түрде жүргіземіз. Бірақ сәйкестік стандарттарының жоғары деңгейін сақтаймыз».

Meta-ның құпиялылық және сәйкестік мәселелері бойынша директоры Мишель Протти тәуекелдерді басқару бөлімі қызметкерлеріне қысқартулар туралы хабарлаған. 

Meta-ның тәуекелдерді басқару бөлімі компания өнімдері мен функцияларына байланысты түрлі тәуекелдерді бағалаумен, құжаттаумен және компанияның жаһандық реттеуші органдар талаптарын орындауымен айналысады. Бұл бөлім Facebook компаниясы АҚШ-тың Федералдық сауда комиссиясы (FTC) тарапынан 5 миллиард доллар айыппұл төлеп, деректер құпиялылығын қатаң сақтауға міндеттелгеннен кейін құрылған.

Федералдық сауда комиссиясы (FTC) тұтынушыларды қорғайтын және монополияға қарсы заңдарды орындайтын АҚШ-тың тәуелсіз мемлекеттік мекемесі. Ол жалған, алдамшы және әділетсіз бизнес жүргізудің алдын алып, тұтынушылардың шағымдарын тергейді.

Superintelligence Labs-тағы қысқартулар Meta-ның негізгі ЖИ-зерттеу орталығы – TBD Labs-қа әсер етпеді.

Meta өкілінің пікірінше: «Біз тәуекелдерді басқару және сәйкестік жүйелері арқылы саланың ең күрделі бағдарламаларының бірін құрдық. Ол бізге өнімдеріміз бен функцияларымызды бағалауға көмектеседі. Біз инновацияны жеделдету үшін команда құрылымын үнемі жетілдіріп отырамыз».

2019 жылы компания FTC-пен Cambridge Analytica деректер құпиялылығы дауына байланысты келісімге келген соң, Мишель Протти Meta-ның құпиялылық бағдарламасын басқаруға тағайындалған болатын.

Meta соңғы жылдары тәуекелдерді басқаруды оңтайландыру үшін жасанды интеллект технологияларын енгізіп келеді. Компанияның айтуынша, қазіргі жүйе күрделі генеративті жасанды интеллектке емес, базалық автоматтандыру үдерістеріне сүйенеді.

Meta-ның саясат жөніндегі вице-президенті Роб Шерман маусым айында LinkedIn-де жазғандай: «Біз белгілі бір өнімге қандай заңдық және саяси талаптар қолданылатынын автоматты түрде анықтайтын құрал әзірледік».

Шерманның сөзіне қарағанда, ЖИ тәуекелдерді бағалау жөнінде шешім қабылдамайды. Бірақ ережелерді автоматты түрде қолдану – шешім қабылдау уақытын қысқартып, адами қателіктерді азайтады.

Жасанды интеллект мистер Бинге қалай көмектесер еді?

Жасанды интеллекті кадрларды қысқартуға қолдану үрдісі басқа компанияларда да байқалады. JPMorgan Chase және Goldman Sachs сынды ірі банктер жасанды интеллект арқылы тиімділікті арттыруға басымдық беріп, жаңа қызметкерлерді жалдауды баяулатып жатыр. JPMorgan-нің қаржы директоры Джереми Барнумның айтуынша, ЖИ енгізілуіне байланысты банкте жаңа қызметкерлерді қабылдау шектелген.

Salesforce бас директоры Марк Бениофф қыркүйек айында: «ЖИ мүмкіндіктерінің өсуіне байланысты, біз тұтынушыларды қолдау қызметіндегі 4000 қызметкерді қысқартамыз. Agentforce бағдарламасының тиімділігі бұны мүмкін етті», – деп мәлімдеген.

Meta енді Facebook жазбаларында заңдар мен құпиялылық талаптарының орындалуын тексеру үшін жасанды интеллекті енгізіп, қызметкерлерді қысқарта бастады. Бұл өзгерістер шығынды азайтып, тиімділікті арттыруды көздейді. Жасанды интеллект шешім қабылдамайды, бірақ процестерді автоматтандыру арқылы адам қателігін азайтып, жұмысты жылдамдатады.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.